朋友是前線警員，守金鐘。我不時會向他笑言，「快啲介紹高大靚仔警察哥哥畀我識啦。」

「哩個時勢，畀人知道你拖個警察出街，即刻有人問候你啦。」

「點會呀？你睇鎮德bb同警隊男神，幾受歡迎啊！」

「=。=！！！」對方都頂我唔順。

每日四點鐘在記者會見面的許SIR大家都好熟悉，咁「警隊男神」又係邊個？

網上流傳片段，一名在旺角執勤的前線警員，面對群情洶湧示威者的想衝出馬路，冷靜自若地一邊引領激動的人群返回人行道，一邊說：「慢慢行番上去，唔好撞，慢慢黎。」影片尾段，最前排的示威者突然說口渴想飲水，這名警員就將自己僅餘的四分之一樽裝水遞予該人，還幽默地說「留番啲俾我啊」。期間較後排有人士喝罵：「黑警！黑警！」不過，這名警員完全沒有震怒，繼續安排在場人士返回人行道並說「大家都是香港人」。

好一句「大家都是香港人」！

我與很多沉默的港人一樣，一直不希望佔中發生，而佔領事件發生後，亦感到十級無奈、憂心、痛心，但也正正是佔領事件的發生，讓我們真真正正感受到，香港，勝在有盡忠職守的警察。

在美國，天黑了一個女仔不敢在偏僻街道獨自行走；在歐洲，即使是人來人往的旅遊區，也隨時會被偷走或是搶走護照、相機、電話；在東南亞某些地區，根本警察就係「大曬」，甚至遊客要留下「買路錢」。

在香港呢？蒲到三更半夜，依然可以獨自回家；坐在戶外咖啡室可以將手提電腦、電話隨意放在檯面，就連違法佔領路面，也有警察用自己的血肉之軀隔開反對意見之人。我們的放心、安心背後，是誰的努力？

有人說，警察受薪，幫助市民天經地義，咁就可以「有事就搵警察，冇事就鬧警察」？佔領馬路者，坐在那裡多少天，警察，法治的守護者，就在那裡站了多少天，換來的是辱駡、指責、挑釁？

大家都是香港人，將心比心吧。

利申：「警隊男神」好靚仔，但我絕對唔係因為佢靚仔先支持警察，因為每一個緊守崗位的執法人員，都值得我們支持！