《生果報》老闆黎智英因為被控欺詐罪而還押，外界（當然是攬炒派支持者），紛紛「聲援」黎智英，一個較為流行嘅說法，就係話黎智英一案只涉「民事」，點可能將佢還押，變相要佢坐監呢？對於呢種似是而非嘅講法，廣男想問兩個問題，第一係黎智英以超低價取得將軍澳地皮，用緊嘅係咪公共資源？第二，就係有人如果利用公共資源做「其他嘢」甚至牟利，咁係咪涉及欺詐呢？包庇還包庇，但如果將刑事罪行講成「民事責任」，就令人好難接受喇！
事件涉及欺詐
關於黎智英一案，廣男先不論佢係咪有罪，問題嘅癥結，在於佢取得嘅將軍澳地皮，係以優惠價取得，可以話係用咗公帑、公共資源去扶助佢搞媒體事業；如果最後發現並證實有人攞塊地做其他嘢，仲要可能係賺錢嘅，有冇問題？廣男仲想問下，如果個個都咁做，咁政府咁平賣地、租地俾人，咪變相鼓勵啲人先佔用公共資源，再做不符地契嘅嘢牟利？大家可以先諗下，咁樣係咪唔合理。
老實講，黎智英作為攬炒派嘅最大「金主」、幕後操盤人，佢「一方有難」，攬炒派「八方支援」佢，廣男絕對理解。但廣男要問一句，係咪因為黎智英嘅「金主」身份，就可以犯法而不被追究呢？至於唔俾佢保釋嘅問題，其實仲簡單，前幾日攬炒派先有個許智峯「畏罪潛逃」，之前又有黃台仰以至李東昇等「著草」例子，如果法庭隨便被黎智英保釋，「有財有勢」嘅黎智英要「著草」，相信唔難。
支持港青移民？
喺黎智英還押前，佢接受咗一個訪問，提到自己認為年輕人移民理所當然，但佢自己就唔會離開，因為「在這裏的得着遠比犧牲多」，又話依家「個氣氛好窒息」、「留低抗爭為香港由自由爭取」云云。廣男想講，點解青年想走？因為香港情況變差。咁點解香港情況變差？因為過去一年多時間，黑暴運動攬炒咗香港！黎智英等人可能覺得自己幫香港爭取緊自由，實則係煽動緊抗爭甚至「打砸搶燒」，令香港情況變差。
所以，不論黎智英講咩，廣男都要講一句，唔好喺度扮「救世主」啦！
原圖：中通社
請Follow我們的YouTube頻道：https://bit.ly/2kgU8qg
下載我們的手機應用程式，收看第一手精彩內容：https://www.speakout.hk/app
評論