大家諗下，如果外國勢力要借香港打擊中國，最有效、最低成本嘅方法係咩？就係不斷聲援香港嘅黑暴分子，甚至「送高帽」俾黑暴分子，令佢哋自豪地繼續「反中事業」。今日廣男睇新聞，見到《生果報》報道指美國非政府組織「自由之家」日前頒發自由之家年度獎項（Freedom House Annual Awards），「香港民主運動」係獲獎嘅三個單位之一，由流亡英國嘅前香港眾志創黨主席羅冠聰代為領獎；羅冠聰係網上領獎活動上表示「抗爭未死，仍有很多人前仆後繼地為香港民主付出努力奮鬥」。抗爭未死？如果抗爭未死，點解羅冠聰呢啲「抗爭領袖」要潛逃海外？講真，自己就著咗草，又何必再去「鼓勵」抗爭，「渡人」做炮灰呢？
國安法後政客退的退、縮的縮
對於羅冠聰以至《生果報》都強調抗爭未死，廣男首先想講，唔好呃人啦！喺《港區國安法》立法、實施前後，攬炒派陣營嘅政客縮嘅縮、退嘅退，潛逃嘅潛逃，黑暴嘅街頭「力量」又銳減，抗爭點樣「未死法」？聲稱「抗爭未死」或者「可繼續抗爭」，客觀效果就係政客繼續喺「安全位置」煽動他人，而相信佢哋嘅黑暴支持者，就成為政客反中亂港嘅炮灰。廣男覺得，羅冠聰呢番話就有如「政客的綿裡針」，信佢嘅人可能「中咗招」都未知咩事。
作為一個反中分子，羅冠聰當然亦不忘借機抹黑中國，報道指佢聲稱「中國不但從未邁向民主，反而倒行逆施，不斷滲透，希望瓦解西方民主體制」，此話當真？廣男真心想問下，中國幾時想要「瓦解西方民主體制」，睇返近年發生嘅種種事情，好似係西方想「瓦解」中國多啲喎，羅冠聰崇洋唔緊要，但請唔好顛倒是非！
西方「加持」 讚揚黑暴
喺同一報道，廣男見到美國國會眾議院議長佩洛西表示「年輕的香港示威者在一年多以來展現的抗爭勇氣，與不尊重法治的懦弱政府形成鮮明對比」、美國共和黨籍參議員魯比奧稱「香港有那麼多人勇敢冒極大風險發聲對抗北京，美國人深受港人的勇敢和遠見啟發」，呢啲美國政客所讚揚嘅人，包括打砸搶燒嘅暴徒嗎？其實，自由係一回事，但如果因自由而施行暴力，咁已經係扭曲自由嘅界線了！
圖片來源：RTHK、中通社
請Follow我們的YouTube頻道：
下載我們的手機應用程式，收看第一手精彩內容：
瀏覽我們的IG：https://www.instagram.com/speakout_hk/?hl=zh-hk
評論