「毒媒」自食其果
「毒媒」自食其果

旺角暴動案最近判刑,近年喜歡為暴徒塗脂抹粉嘅《蘋果日報》,為吹捧梁天琦不惜「一而再」用頭版報道「表揚」梁天琦,一時話大狀讚梁天琦有承擔、不放棄香港,一時又話梁天琦勉勵香港人要重建浮城。奇怪嘅係,《蘋果》喺果兩日頭版登梁天琦,咁啱果兩日都冇任何全版廣告,而自《蘋果日報》推出「爆相爆片」叫人侵犯四任特首家人後,平均每日都冇三版全版廣告;再睇番佢哋前日公布業績,過去一年蝕咗近五億元,到底係經濟唔好,定係佢哋嘅缺德編採方針,令佢哋「越蝕越多」呢?唔通呢啲就係「因果」?


虧損擴大有因由


《蘋果日報》母公司壹傳媒日前公布全年業績,截至今年3月31日為止,年度虧損多達4.76億元,比2017年同期蝕3.93億仲要多,虧損情況可以話一年比一年嚴重,而壹傳媒董事局喺解釋虧損原因嘅時候,就話「經濟增長放緩」等等。但事實係咪咁簡單呢?點解其他媒體就算冇壹傳媒咁「火紅」咁賺到錢,壹傳媒就越蝕越多呢?


從梁天琦事件以至「爆相爆片」呢啲事件後,除咗見到《蘋果日報》全版廣告少之外,有啲日子直頭係一版全版廣告都冇?致命原因係咩好難講,但據報就有抽起廣告嘅廣告商話,如果讀者朝早睇完《蘋果日報》,成日心情都唔好,仲點會有心情去消費呢?又或者,如果睇完啲誇張失實嘅報道,唔信篇報道之餘,又點會信登喺隔離嘅廣告呢?總之,登咗廣告,咪等於白登囉!


爆相爆片有助「吸廣告」?


由此觀之,《蘋果日報》搞甚麼「爆相爆片」,利誘讀者爆四任特首家人私隱或者其他猛料,有可能就係因為要挽回頹勢,借「爆相爆片」吸多啲廣告或者View;不過,如果《蘋果日報》「進一步」放棄道德底線,借住針對唔同人士嚟刺激廣告收入、銷量甚至瀏覽量,到底係「良藥」定係「毒藥」,真係言之尚早。


原圖:Takungpao

評論