//壹傳媒有錢唔出糧，但有錢還畀黎智英？黎智英當日講到自己幾有「社會責任」，不如為千萬欠薪「找數」啦﹗《蘋果》一班前員工有汗出無糧出，得個吉要怪邊個？//

《蘋果日報》停刊已經一個月，但超過800個員工，6月份糧仲未出，拖欠薪金估計超過1,000萬。壹傳媒梗係有籍口啦，話被凍結1800萬資產無錢出糧喎。有汗出無糧出，部分前蘋果員工已經向勞工處求助，壹傳媒乾塘係咪大話？睇來瞞得一時瞞唔到一世﹗

同大家Fact Check番壹傳媒盤數啦，壹傳媒3月底現金結餘約 5.21億，當時仲發公告話營運資金可以用至少18個月。轉個頭喺4月1號，就向黎智英償還股東貸款1.5億元，所以喺5月31日，壹傳媒都仲有約3.37億元。到6月中保安局引用《港區國安法》凍結《蘋果日報》3間公司，共1,800萬元嘅資產。扣起1,800萬呢條數，壹傳媒其實仲有3.19億，嗰千零萬欠薪濕濕碎啦，有錢還俾黎智英做咩唔出糧呢？

嗱嗱嗱，黎智英去年4月拍片話《蘋果》告急，墊支咗5億5千萬出來，話係「對社會的責任」喎。講到咁大義凜然，咁黎智英收番嗰1.5億，如果拎個零頭出來，千零萬欠薪，夠找晒條數有突啦！真係難為一班前員工信晒「齊上齊落」嗰一套，當日為你拋頭顱灑熱血，到頭來得個吉。好聽就義工，實際係Condom咋﹗

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk