近排潮語係咩？笑聞話你知，聽住啦，係「白色恐怖」！

呢，電台節目主持嗰時被炒，話「白色恐怖」；近排肥佬黎俾錢泛民，又「白色恐怖」；連有網媒執笠，總結又係「白色恐怖」；嘩，真係「沒有最恐怖，只有更『恐怖』」呀！

講真，得罪老闆有邊個唔會畀人炒呢，阿主持人？政界人物畀人踢爆「收錢做嘢」，你係有做過架喎，點計都唔係有人迫害你囉！查實，呢啲根本係叫做揭弊，你唔想俾人知但被人揭穿咗，唔好以為一句「白色恐怖」，就唔使去申報先得架？

「SHU」一聲停止運作既網媒就仲離奇，創辦人明明係話冇人落廣告所以要執笠，但又要話社會瀰漫住「白色恐怖」既氣氛，睇真啲，佢話喎，每次過境返大陸都「提心吊膽」，令佢感到壓力。吓？咁到底有無受到咩實質迫害呀？冇交代架，講之嘛。

一個可以隨意出入內地既人，竟然暗示自己受政治逼害；今時今日香港，將「白色恐怖」呢個詞玩到爛，而完全唔駛拎出證據，隨口噏當秘笈；最睇唔過眼係，只係打住所謂「民主」旗號，社會就有責任保住你份工、你收錢唔申報唔可以批評你、包保你生意興隆咁。借用資深傳媒人MICHAEL CHUGANI的文去講，就算你批評我，我只會話係言論自由，而唔係白色恐怖囉。