聲大夾惡、毫無悔意、以為民主「大晒」，呢啲都係反對派政客嘅特質。李卓人、梁國雄等人被票控違反禁聚令，佢哋拒絕繳交罰款同否認控罪，經審訊後，裁判官認為「罰款並不足夠」，所以判各被告監禁14日，緩刑18個月，呢單係第一宗經審訊後被判違反禁聚令罪成嘅案件。其實呢單案，再次顯示政客唔係大晒，犯法仲要擺出一副「我無錯」嘅姿態，更加要罰！

無視警方警告

睇返相關報道，佢哋喺去年5月1日「遊行請願」當日，其實警方發告票時已經多次警告八名被告，加上佢哋嘅遊行被傳媒廣泛報道，可能令公眾對禁聚令構成錯誤理解，所以罰款並不足夠。裁判官判刑時指出，佢哋有共同目的、組織、有共用示威用品，從佢哋嘅互動同距離可以肯定佢哋係一個群組，而梁國雄喺審訊時亦用「我哋」形容各被告，反映佢哋係「一個單位」。簡單嚟講，佢哋嘅人數、行為、距離等，均可見佢哋係聚埋一齊「犯聚」嘅人。

老實講，一般人違反禁聚令，可以票控、罰錢了事，但今次呢班政客或者被告，首先無視警方警告，之後又拒絕交罰款同否認控罪，法庭除咗判監、判緩刑等，仲有咩「寬恕」空間？呢件案，並唔係一般禁聚案件，而係一群政客示威之餘，公然用行為話俾全香港聽，禁聚令係可以「唔守」嘅，咁如果唔重罰佢哋，絕對會產生不良影響。

遊行請願不是理由

本港嘅反對派政客或者媒體，一直向大眾灌輸「遊行集會凌駕一切」嘅錯誤訊息，但係喺新冠肺炎肆虐嘅情況下，政府推出禁聚令有理有節，反對派政客要以身試法，就預咗要承擔罪責！如果今日因為政客要「遊行請願」而唔使守法，咁他日其他人有其他「理由」，係咪又唔使守法？喺公共衞生嘅前提底下，無可避免會有措施防止病毒傳播，反對派請唔好扮被「打壓」！

其實，打從反對派搞違法佔領開始，佢哋就有一種「我有權利做ＸＸＸ」嘅錯誤觀念。違法佔中？無問題！旺角暴動？係政府錯！反修例風波暴力不斷？係政府造成！今次違反禁聚令？「和平示威我係問心無愧」！總知反對派做乜都「無錯」！所有問題都係「政府打壓」！講到咁有骨氣，反政府咁義無反顧，唔知社民連嘅區議員會唔會宣誓效忠特區呢？

原圖：rthk

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk