梁家傑的「自保術」
梁家傑的「自保術」

曾經係攬炒派「第二大黨」嘅公民黨,經歷完「DQ四人組」事件之後,似乎終於開始知驚。之前公民黨黨主席梁家傑先話,政黨路向將來要保持低調,擺到明同大家講佢哋想縮沙,唔想再惹麻煩。或者梁家傑怕大家「Get」唔到,日前佢受傳媒訪問嗰陣就「畫公仔畫出腸」,話自從《港區國安法》實施之後,已經兩度拒絕外國議會嘅訪問邀請,「可免則免」、為免「送頭」咁話喎。廣男就覺得,梁家傑果然係「人老精、鬼老靈」,為求自保甩身,縮沙縮到連口水都慳埋?!


根據梁家傑嘅講法,佢之前分別拒絕咗兩個來自歐洲議會同美國邀請嘅網上對話,原因就係因為要「小心點」,廢事有與會者喺對話中講「中央不中聽」嘅說話,如果梁家傑唔出聲就等如默認,所以佢認為呢啲事應該可免則免。梁家傑仲提到,無論有幾唔鍾意《港區國安法》,該法都已經存在喺法律之中,與其「送頭」、「硬闖硬碰」,不如保留實力同低調啲。其實梁家傑「封口」嘅理由好簡單,一句講晒,就係唔想自己有觸犯國安法「之嫌」。


梁家傑不是說要「講真話」嗎?


廣男仲記得,梁家傑上星期明明仲喺《生果報》嘅專訪入面話公民黨會「堅持講真話」,點解外國邀請對話,畀埋平台你發表意見,依家又要縮沙? 咁仲點「講真話」?係咪因為怕惹麻煩上身,同外國溝通都唔敢?但係如果梁家傑真係咁驚,點解佢又會話如果駐港外國使節提出邀請,出席係正常?係咪因為同外國使節可以閉門會面,內容唔洗公開,可以畀機會梁家傑靜雞雞「勾結外國勢力」?另一個問題係,既然梁家傑都講到明唔想自己「送頭」,廣男又好想知,喺呢一刻,佢又會同果班參與黑暴運動嘅年輕人講啲咩呢?會唔會都勸佢哋唔好做違法嘢? 


「國際線手足」情何以堪


梁家傑作為資深政客,依家有辦你睇,可謂係相當識時務,連外國訪問都唔做,之不過,令到一般聲言要「打國際線」嘅攬炒派政客以至「後輩」又情何以堪?梁家傑乖乖收口,就可以繼續帶領公民黨走「議會之路」,而「走佬」政客就要喺外國顛沛流離,甚至背負涉違《港區國安法》嘅罪名,打住無意義嘅「國際線」,唔知佢哋見到梁家傑嘅「轉變」之後,到底有咩感想?廣男喺到諗,之前公民黨公然勾結美國,要求對方制裁香港,唔知依家梁家傑又會點樣評論呢件事呢?


如今公民黨出現「退黨潮」,面臨「滅黨」危機,都是因為之前貪勝不知輸,一切都是咎由自取!但「老練、精明」嘅政客,就永遠都知道自己幾時該「退」同幾時收手!


圖片來源:梁家傑facebook


請Follow我們的YouTube頻道:https://bit.ly/2kgU8qg


下載我們的手機應用程式,收看第一手精彩內容:https://www.speakout.hk/app


瀏覽我們的IG:https://www.instagram.com/speakout_hk/?hl=zh-hk

13
好正
1
心心眼
27
好好笑
1
令人傷心
8
嬲爆

評論

  • hnwong
    hnwong
    3年前
    0 回應 檢舉
    唔奸又點做漢奸?
    • 龙的傳人
      龙的傳人
      3年前
      0 回應 檢舉
      汉奸不会講真話~我們好好看他們下場
      • hnwong
        hnwong
        3年前
        0 回應 檢舉
        唔怕醜,笑死人

        沒有更多評論

        沒有更多評論