出生於七十年代未,成長於八十年代。緬懷所謂的Good Old Days,對香港部份人時常嗟天怨地感無奈,認為香港仍然是「只要努力,仍有出頭天」的福地,不擅書寫中文,寧寫口語。
作者其他博評
從「死者還陽、變身逃犯」說起…
從「死者還陽、變身逃犯」說起…

舊年8.31太子站事件之後,網上曾經一度流傳一位名叫「韓寶生」嘅人士失蹤或死亡;一年之後嘅今日,消息傳嚟,呢位真名叫王茂俊嘅「韓寶生」,活生生發出新聞稿,證實自己因為被警方控告8宗罪,已經於上月上庭前夕潛逃英國尋求「政治庇護」。「死者還陽」、仲畏罪潛逃,應該係戳穿「太子站死人」謊言最有力嘅真相,囍雨好奇,今日之前,當呢位王茂俊見到自己幾乎月月都成為黑暴拜祭嘅「亡靈」,心頭係咩滋味?囍雨更好奇,今日之後,果班謊言嘅堅實信奉者,究竟識醒未?!

 

如果你問囍雨,睇番過去一年嘅暴亂,其中一個最深刻嘅體會,係實實在在感受到謠言、謊言嘅破壞威力。藉住「8.31事件」一周年,囍雨留意到有媒體梳理咗過去一年嘅黑暴謊言「之最」,原來,好多事情依家睇番轉頭先至會發覺,大多時候,明刀明槍嘅暴徒暴力,都未算最可怕;蠱惑人心嘅謊言,才最恐怖!

 

煽暴謊言 可一,就可再

 

例如舊年8月11號嘅「爆眼少女」事件——疑似布袋彈、染血嘅眼罩、受傷少女、「永久失明」…所有元素都足以撩動「示威者」嘅暴力神經,更成為國際知名媒體頭版圖文並茂嘅「抗爭故事」,但離奇嘅係,事件真相係點?依家都冇人知;更離奇嘅係,似乎仲有人想阻止追查真相,連「爆眼女」本人都消失無蹤、下落不明。但大家唔好忘記,借住「警察還眼」嘅「感召」而引發之後嘅癱瘓機場、禁錮毆打內地遊客事件、一次次暴力騷亂,卻無比真實、鐵證如山。

 

又例如所謂「新屋嶺強姦」事件,同「爆眼少女」嘅劇本雷同,無論係「受害者呂小姐」抑或「龍小姐」,佢哋言之鑿鑿嘅「證詞」又鼓動起無數暴徒上街「聲討警暴、討回公道」,但真相竟然係,「龍小姐」最終喺警方全力追查真相過程中一再改口風,新屋嶺變成「葵涌警署」、「性暴」變成「非禮」,直至最後警方聯絡佢時竟全無回覆;而一名36歲男網民被起訴後更承認,自己發貼文指控「新屋嶺強姦」只係為咗「想呃like」。

 

香港亟需立法打擊假新聞

 

囍雨嘅感受係,當有人一旦嘗試過以謊言煽暴嘅「甜頭」之後,真相係點,已經完全唔重要;只要條「橋」受用,可一,就可再!所以之後嘅無論陳彥霖事件也好、周梓樂事件都好,其實性質上都係一樣。前者,就係要將「死因無可疑」無限演繹成「最大疑點」;後者,又「成功地」塑造出一個「烈士」形象…所有嘢嘅,都係為咗要指控「警察殺人」、繼而要求「血債血償」,由此發起一浪接一浪嘅打砸搶燒。

 

以前,我哋可能會相信「謠言止於智者」,但經過過去一年嘅暴亂,囍雨發覺——其實未必!所以對於未來,囍雨想講,恐怕香港真係有必要加快建立專門打擊謠言、謊言、假新聞嘅法律機制。其實呢樣嘢,一早唔係咩新鮮事物,例如新加坡,舊年就已經通過相關法例打擊假新聞,除咗罰款之外,最高刑罰可以高達10年;而日本、韓國甚至英、法、德等歐洲國家一樣有類似嘅法律。人哋得,點解香港就唔得?!尤其,以香港今時今日嘅政治環境,當謊言加上別有用心嘅政客,所產生破壞力更加驚人,如果冇法律規管,冇人挺身戳破謊言,香港恐怕難有安寧日子!


原圖:網上影片截圖


請Follow我們的YouTube頻道:

https://bit.ly/2kgU8qg

 

下載我們的手機應用程式,收看第一手精彩內容:

https://www.speakout.hk/app


瀏覽我們的IG:https://www.instagram.com/speakout_hk/?hl=zh-hk

9
唔係呀哇
17
嬲爆
4
驚訝

評論