黎智英被「誅九族」?
黎智英被「誅九族」?

對於《壹傳媒》創辦人黎智英被捕,有唔少人都認為正義得到彰顯,亦有人認為黎智英作為本港勾結外國勢力嘅「頭號人物」,被拘捕只係遲早嘅事。不過,警察有警察執法,攬炒派以至黎智英本人及其附庸媒體,當然唔會承認自己有問題啦;例如黎智英本人,就話事件「政治化得好緊要」,連佢兩個仔都拉「有啲誅九族嘅意味」,講到呢度,黎智英嘅意思好明顯就係話自己以至家人被「政治打壓」,但囍雨又係果句,有人涉嫌犯法就要拉,唔好搵藉口轉移視線!
 
警方拘捕 有理有據
 
喺呢度,囍雨又要不厭其煩地講句,黎智英係因為涉嫌違反「港區國安法」及串謀欺詐等罪而被捕,警方亦都講得好清楚,係有傳媒高層透過外國戶口財政上支持「要求外國制裁香港」嘅組織,呢件事與新聞自由無關,任黎智英講到幾漂亮,講到幾多人支持佢令佢幾「感動」兼「飲泣」,都改變唔到事實。至於佢兩個仔,被拘捕嘅罪名都與政治或新聞工作無關,根本亦無事件「政治化」呢回事。
 
有啲人有種錯覺,總以為只要係政治人物,尤其係攬炒派果邊嘅政治人物,只要被捕,就係「政治打壓」,但事實係,不論被捕人嘅身份,政客好,傳媒老闆好,有外國勢力撐腰嘅人都好,如果涉嫌違法,警方就要拘捕佢哋;香港作為法治之地,無人可以逃避罪責,所以就算黎智英講得幾響亮、幾感性,一樣改變唔到佢涉嫌違法嘅事實。
 
中央、港府決心大
 
喺「港區國安法」實施前後,有攬炒派人士分析「港區國安法」只係用嚟嚇人,未必會「動真格」,其實,呢種分析大大低估咗中央以至特區維護國家安全嘅決心;自去年黑暴運動以來,「搞港獨」、「勾結外國勢力」以至「攬炒香港」成為攬炒派人士嘅行動綱領,中央、港府唔止要立法,仲要執法,因為如果唔執法,黑暴、「港獨」歪風就會死灰復燃。中央、港府執法嘅決心,唔會因為外國所謂「制裁」香港而改變,囍雨就覺得,如果有人心存僥倖,認為可以以身試法,咁就真係要講句,「後果自負」喇!
 
原圖:文匯報

請Follow我們的YouTube頻道:

https://bit.ly/2kgU8qg


下載我們的手機應用程式,收看第一手精彩內容:

https://www.speakout.hk/app


瀏覽我們的IG:https://www.instagram.com/speakout_hk/?hl=zh-hk

12
嬲爆
2
超無奈
1
無意見

評論