近日唔同區嘅區議會開始會期，如果要用一句說話去概括唔同區議員、尤其係反政府議員嘅表現，就係「鬥做騷」！噚日屯門、元朗、北區同葵青等區議會開會，有啲議員就喺會上高唱「黑暴」歌曲，有啲就話要爭取「五大訴求」；最誇張嘅係，新當選為北區區議會主席嘅羅庭德，仲高調表示要「重奪執政權」。唔係囍雨想批評羅庭德或者其他所謂「本土派」，但區議會其實係個諮詢架構，如果做個區議員就可以「重奪執政權」，會唔會有啲浮誇呢？
社區自治 重奪政權？
雖然電影對白都有講過「人如果無夢想，就同鹹魚無分別」，但係羅庭德講嘢，實在係有啲Over，當中言論包括「各區自治格局已成，未來四年繼續為地區充權」、「由下而上重奪執政權」、「恢復七十、八十年代香港工業強國之榮光」、「以最大的氣力掃除獨裁傀儡的林鄭政權，實現『光復香港』」等等，睇到呢啲言論，大家有冇種有人喺區議會宣讀緊「港獨」宣言嘅感覺呢？
對於羅庭德一番說話，囍雨首先有個質疑，就係佢話「各區自治格局已成」，但區議會理論上只係一個諮詢性質嘅架構，負責俾意見政府同埋處理下一啲撥款等等，點解佢哋一班「本土派」當選，就會變成「各區自治」呢？呢一種講法，可能對於支持「本土派」嘅市民嚟講可能好鼓舞，但如果你問囍雨，囍雨就覺得羅庭德似誤導緊市民多啲囉！
至於羅庭德話要「重奪執政權」、「光復香港，時代革命」，又稱香港曾為工業「強國」，囍雨覺得佢就算唔係明目張膽搞「港獨」，佢一番說話嘅「獨」味都相當重下；觀乎羅庭德嘅語氣，似乎佢非常支持「本土民主前線」前發言人梁天琦嘅理念，囍雨唔知道，如果真係有區議員喺區議員職務期間宣揚「港獨」，政府同社會，應該點處理呢啲議員呢？
區會的未來會是怎樣？
區議會由重視民生走向重視「政治」，基本上已經係一個定局，囍雨最關心嘅地方，係一班新紮議員會唔會剩係掛住搞政治嘢，而忽略咗民生、地區議題；更重要嘅問題係，如果呢班反政府區議員利用職權、公帑（十八區都係）將「黑暴精神」散播到社區，香港會唔會再出現新一輪黑暴運動？講到呢度，實在係有啲擔心！
圖片來源：RTHK
請Follow我們的YouTube頻道：
下載我們的手機應用程式，收看第一手精彩內容：
評論