盲反派喺區議會「報捷」，事後盲反派政客以至媒體均高調聲稱呢個係市民「五大訴求」嘅勝利，作為被稱為盲反派「金主」嘅《生果報》老闆黎智英，當然亦不忘出嚟抽水，佢寫文聲稱呢啲係「歸功於反送中年輕抗爭者和上街遊行的市民，是香港人為了保護家園前所未有團結的成果」；其實，更正確嘅講法，應該係盲反派一眾政客以至黎智英食「人血饅頭」，利用抗爭行動、年輕人嘅前程換嚟區議勝利，當呢班人仲好意思「歌頌」人民嘅時候，囍雨剩係想問一句，咁依家俾人拉、俾人告啲年輕人點算先？
推波助瀾 純為選舉
黎智英日前喺自己旗下嘅《生果報》寫咗篇題為〈燈蛾撲火換來勝利 考驗路漫長〉嘅文章，稱呢場「出其不意」嘅勝利要歸功於年輕抗爭者同上街遊行嘅市民；值得一提嘅係，佢喺自己篇文章寫到「黃毓民、黃洋達和陳雲等叫人選舉投白票，或將票投入鹹水海，因為抗爭者流血泛民袋選票，是食人血饅頭」，仲話呢啲係「無恥之徒說話」。老實講，囍雨覺得呢番說話好有道理就真，盲反派如果唔係食緊「人血饅頭」，唔通係因為地區工作「做得好」而贏得議席？！
一直以嚟，囍雨寫文章都好強調一點，就係盲反派一直喺反修例行動推波助瀾，當中主要原因就係為咗選舉；唔知大家仲記唔記得，月前喺一個《生果報》做嘅圖片特輯入面，就話要建制派「血債票償」，即係年輕人嘅所謂「血債」，要用選票去「償還」。所以近幾個月，無論係話啲年輕暴徒係「衝衝子」，縱火狂徒係「火魔法師」，甚至讚揚襲警搶犯者係「英雄」等等，都係想合理化暴徒暴行，令到班後生仔真係相信「勇武有出路」，再稱責任在於政府同建制派，然後選舉臨近，就全面催谷人投票。如果呢啲唔係食緊「人血饅頭」，囍雨真係唔知盲反派政客「食緊咩」。
黑手正在高床軟枕
如果勇武抗爭真係咁值得讚揚、歌頌，點解大家唔見黎智英、黎智英啲子女以至盲反派政客啲子女出嚟做「衝衝子」、「火魔法師」？因為呢啲「尊貴」嘅政客都知道，自己、自己子女出嚟衝必定死路一條，呢啲嘢都係留返俾人哋仔女去做。講到呢度，就令囍雨諗起日前有個伯伯受訪，講佢入獄嘅兒子成為咗「炮灰」，諸如黎智英嘅政客推人哋子女「行前啲」、做炮灰，依家仲好意思喺度抽水，講風涼話？實在令人不齒！
原圖：中央社
請Follow我們的YouTube頻道：
下載我們的手機應用程式，收看第一手精彩內容：
評論