【認真肉酸】民主派人士都唔敢用真名? 好肉酸囉!
【認真肉酸】民主派人士都唔敢用真名? 好肉酸囉!

囍雨一直唔明,反對派(泛民主派?)人士,唔係一直自恃站喺道德高地、高舉所謂普世價值,所以可以同時批評特區政府同建制派,話佢哋見得光,自己先係民意所在嘅咩?既然係咁,點解所謂民主派人士接受反對派喉舌《生果報》訪問時,竟然連真名都唔敢用呀?平時唔係好威威、信口開河亂咁鬧架咩,因乜喺《生果報》上見報時,竟然自貶身價做「民主派人士」呀?係自知評論無稽,所以「冇名見人」,定係《生果報》自行創作,「老作」意甩扮「分析」呢?

 

反對派為政治「死咬唔放」

 

反對派炒作已經定案嘅「UGL事件」,至今仍然樂此不疲;好似尋日之嘛,成個反對派大吹雞,結果吹咗五百幾人出嚟遊行,話要追究律政司司長鄭若驊喺處理「UGL事件」上嘅責任。而為咗營造到成件事「似層層」,《生果報》連日來都不遺餘力,早兩日就刊出一篇題為〈政界:印證北京放生梁振英〉嘅文章,大量引述所謂民主派人士意見,指律政司決定唔會就「UGL事件」檢控全國政協副主席梁振英,其實並唔係冇需要,而係唔敢拎;又話「北京要港府放生梁振英,呢個說法越嚟越似係真」。

 

首先,眾所周知,「UGL事件」係獲得審查貪污舉報諮詢委員同意下先至正式結案嘅,反對派係都要屈話件事處理唔公道,計囍雨話,係呢班人對香港行之有效嘅廉政制度唔公道至真!話今次係「放生」梁振英,本身就係對香港廉政公署嘅極大侮辱,而呢班人亦清楚知道,廉署係唔可能公開回應佢哋呢啲不公平言論同指控,所以先至會講得咁肆無忌憚,大家話呢班人係幾咁卑劣吖。

 

不具名「分析」 全無可信性

 

其次,今次都唔係第一次架喇,請問《生果報》報道裡面嘅所謂「民主派人士」,到底係邊位?民主派人士喎、講「UGL事件」喎!咁大個光環,以「民主派人士」熱愛抽水嘅往績,點會唔用自己名嚟發表呀?每次睇到呢類故事創作,囍雨都只會得出兩個結論:第一,呢名「民主派人士」自己都唔相信自己所講嘅嘢,由於實在太匪夷所思,所以心虛到唔敢用真名。第二,呢名所謂「民主派人士」根本就不存在,既然不存在,自然就唔可以落名啦,因為「無名可落」吖嘛!

 

無論係第一定第二個理由都好,結果都只有一個:《生果報》所謂嘅「拆局」、「分析」,全部都唔值得信納,可靠性非常成疑!講真,反對派為咗炒作「UGL事件」,早就已經去到無所不用其極嘅地步啦,又講返尋日個遊行,五百幾人咪五百幾人囉,反對派仲乜要吹到有一千二百人參加呢?吹大咗個人數,就以為可以將歪理變真理呀?咁不如吹到一萬二千人、十二萬人、一百二十萬人大遊行啦!講到底,反對派政客、喉舌去講「UGL事件」,邊度仲有「公道」兩個字可言架!

圖片來源:蘋果日報網站截圖

18
嬲爆
3
無計啦
9
唔係呀哇

評論