學中文 都唔得?
學中文 都唔得?

近幾年社會日趨兩極化,從政者好、市民好,甚至藝人都好,只要講咗啲稍為唔啱「網民心水」嘅嘢,隨時隨地都萬箭穿心,而且仇都冇得報。好似噚日咁,廣男喺網上睇到一單新聞,話早年已經移居美國嘅藝人吳彥祖早前接受傳媒訪問,透露後悔無學好中文,仲話要幫個女揀一間中文幼稚園。呢番說話聽落去真係平常得交關,但就有個別網民竟然大肆批評,有啲就話吳彥祖學中文方便番內地拍戲,有啲就質疑「美國人無啦啦學咁好中文做乜?」,有啲就話要學就學廣東話同正體字。「反中」反到連人哋正常教導個女、想學好中文都唔畀,大家話呢班人係唔係「上腦」吖!香港人思想咁封建狹隘,仲話係國際大都會,真係講出去都畀人笑啦。


一切都是因為「反中」?


老實講,人哋要學咩語言,或者人哋想仔女學好咩語言,基本上都係人哋嘅選擇,關你哋咩事呢?吳彥祖想個女學好中文,無論係為個女將來生活,或定係將來學業同事業發展都好,呢啲都真係同外人無關架喎。當有網民將學中文同政治拉上關係嘅時候,廣男又要問一句,美國總統特朗普都有孫女學中文仲要播埋片畀我哋國家主席同主席夫人睇架喎,唔通美國總統又「親中」呀?


個別網民將一啲平常事都變做「不平常」而加以撻伐,理由其實好簡單,就係呢啲人「反中」上腦,連人哋想學好中文都唔得。但廣男覺得奇怪,有啲網民質疑人哋做乜要學中文,但其實自己咪一樣用緊中文去話人;呢個情況反映一件事,就係即使你幾否定中文都好,你始終都撇唔清中文甚至國家同自己嘅關係。


外國人都可以學中文


廣男讀書嘅年代,老師已經成日同我哋呢班學生講,世界變喇,剩係識得廣東話同英文都未夠,將來讀書抑或工作,多多少都要識普通話,唔係日後會好唔方便。當外國好多人都開始學中文同普通話嘅時候,香港反而有人咁抗拒普通話,而家甚至發展到抗拒「中文」,連人哋想個女讀中文都唔畀、要去管,大家覺得咁嘅香港仲健唔健康呢?雖然呢啲噪音只係來自少部份有強烈「反中」心理嘅香港人,廣男覺得佢哋目光要放遠啲、心胸要廣闊啲先得架!


原圖:騰訊視頻

38
嬲爆
15
唔係呀哇
5
無意見

評論