聶廣男,八十後,香港某大學畢業,主修資訊科技,I.T.新晉,靜待「上位」機會。對社會有不滿,未能置業,但比上不足,比下又有餘。傾向建設多於破壞,亦相信積極建言比將一切推倒來得實際。
作者其他博評
犠牲基層 讓美國再強大起來?
犠牲基層 讓美國再強大起來?

美國總統特朗普喺佢參選總統嘅時候,將「讓美國再強大起來」嘅口號叫到響徹雲霄,當時唔少美國人,尤其係藍領白人都深信特朗普可以改變美國甚至係佢哋嘅命運;不過,呢班支持開特朗普嘅美國公民,今次好可能要失望喇。因為特朗普公布任內首份預算案,雖然提出1.5萬億改善基建嘅刺激經濟方案,試圖讓美國「再強大起來」,但係一啲關乎基層嘅醫療、食物援助等開支就要削減。咁玩法,美國要搞番掂啲經濟之前,係先要犧牲啲基層、弱勢嘅福祉?


基層福祉被犧牲?


根據傳媒報道,喺特朗普呢份預算案,美國喺未來十年要削減4.5萬億美元開支,其中為低收入提供醫療保險嘅支出要減、食物券計劃要減、學生貸款計劃要減、農業補助要減,甚至連殘疾支出都要削減。照咁睇,特朗普喺削減基層、弱勢開支方面,真係「不遺餘力」喎!


喺另一方面,我哋睇到特朗普依然喺度增加緊軍費同保養核武器嘅經費,亦都透過國會撥款2千億美金,以鼓勵州政府、地方政府及私營企業動用1萬5千萬美元改進公路等基建設施。廣男唔係咩經濟專家,但觀乎特朗普嘅套路,就係喺節省開支方面向基層開刀,再透過政府、私企出錢谷大個投資支出等,希望借此搞番好美國經濟。


從政者勿忘初心


對於特朗普呢個大幅削減開支嘅預算案,廣男會用「未見其利,先見其害」嚟形容,佢一系列措施例如加大基建開支等,能唔能夠刺激到經濟都未知,班基層就「先見其害」,一直領取嘅援助或者醫療補助就要削減。如果特朗普當初主打嘅藍領工人見到特朗普原來「出手」嘅時候係向佢哋或者佢哋嘅親友開刀,真係唔知會有咩感受呢?坦白講,政府有赤字要減開支好正路,但特朗普一出手就大刀闊斧,首先令美國基層「受苦」,似乎同社會所期望嘅有一定落差喎!


再講一啲係媒體見到嘅特朗普提振經濟措施,其實係經濟差嘅時候加大政府支出,加大投資刺激經濟,幾廿年前都係用呢招架喇,呢啲招數係今時今日仲係咪適用呢?廣男真係唔知,不過觀乎日本首相安倍晉三用類似方式刺激經濟,好似已經唔夠Work喇。有傳媒分析,特朗普呢份預算案可能過唔到國會,因為特朗普要減嘅福利開支太多,事情會發展成點,大家邊食花生邊睇戲啦!


原圖:新華社

評論