基本法委員會主任李飛嚟香港出席《基本法》講座，除咗社會各方都留意住李飛講咩，呢個亦都係盲反派空群而出做政治騷嘅時候。本來熟悉《基本法》嘅李飛嚟香港講下憲法係冇乜特別嘅，傳統盲反派人士都無乜反應，不過新晉、激進嘅盲反派就好似如獲至寶咁，不斷出動「表演」，一時又話直播京官講嘢會開咗灌輸意識形態以及凌駕「人權」嘅《基本法》教育先例，又話要反對《國歌法》等等。囍雨又想講，盲反派唔好成日講到《基本法》係有權利而無義務好唔好？

借研討會做政治騷

無論係社民連、人民力量抑或香港眾志都好，囍雨都係覺得佢哋借《基本法》講座做政治騷，因為中央有人嚟講《基本法》，同通識老師喺堂上面教學生國家、香港制度一樣咁普通，有咩需要將佢無限放大，連《基本法》都唔畀人講、唔畀人聽咁惡呢？唔通盲反派叫人犯法就得，官員講番啲法理就唔得？

至於好似黃之鋒所講，學校直播《基本法》研討會，未來會「變本加厲，灌輸意識形態以及凌駕公民意識、人權的《基本法》教育，扭曲社會核心價值」，囍雨同樣有啲保留。《基本法》保障市民人權、自由、法律權利等係不爭事實，但《基本法》一樣寫到明香港係國家一部分，全國人民代表大會授權香港高度自治，佢哋又搞唔搞得清楚呢？

只談權利很危險

正如北京大學法律學者饒戈平所言，一班盲反派理解《基本法》嘅時候，只係「選擇性」睇到《基本法》保障市民權利同自由嘅相關條文，但其實《基本法》第一條都清楚講明香港係國家不可分離嘅部分、第廿三條講明香港要自行立法保障國家安全，其他章節上亦講到香港高度自治嘅權力係來自全國人大，咁盲反派係咪都應該睇清楚《基本法》，諗下佢哋係咪有咩唔做得呢？就算佢哋要爭取普選、民主，最起碼都應該喺唔反應國家、中央嘅情況下做嗎？

囍雨成日都覺得，只談權利、不談義務係一個好危險嘅概念，好似噚日盲反派班示威者話「人民大於國家」嘅時候，囍雨就第一時間就諗起2014年嘅違法佔領事件，當時班違法者一樣以為自己有政治訴求就大晒，所以特區、特區法律甚至其他市民福祉都拋諸腦後，如果佢哋所謂嘅「人權」一直無限伸延下去，大家話有幾危險呢？

原圖：RTHK