彩色係成人、綠色係長者、粉紅色就係小童八達通，相信識用八達通嘅各位對佢哋都唔會陌生。最近八達通就搞搞新意思，為八達通換上新設計，畀第一代租用版八達通嘅用戶更換。唔知大家覺得新設計靚唔靚呢？

新款成人八達通變化最大，由彩色變成灰黑色，而小童版就由粉紅色轉成粉藍色，而長者版嘅顏色就不變，卡上「8」字標誌亦改為平面設計，並加上橙、綠、藍色。八達通喺 Facebook 公佈新設計後引起唔少討論，有網民就覺得新款「真係好核突」，又話「新設計咁核突，唔知會唔會減少市民換卡意欲呢？」，不過亦有人表示已經即刻換咗新嘅八達通。

提提大家，三款新卡依家已經喺「八達通服務站」有售，不過只係畀第一代租用版八達通（號碼最後數字並無括號嘅八達通）客戶更換。

圖片來源：八達通 Facebook