//泛民做區議員，唔使做嘢整日搞風搞雨照出糧，咁嘅筍工蔡志強竟然講到「委曲求全」？既然咁委屈，點解又要做到宣誓一刻呀？//

全城期待嘅區議員宣誓終於開始喇，211名區議員將分四批宣誓，首批港島區25名區議員今早宣誓。一班心中有鬼擔心被DQ嘅泛民區議員一早已經跳船辭職。原本以為留低唔辭嘅人，係會乖乖宣誓好好做嘢。點知今日25位區議員中，就有一個拒絕宣誓！講嘅咪就係東區區議員蔡志強，佢唔單止無到場，仲喺社交網站帖文，牙斬斬咁話「絕唔會宣誓，絕唔會委曲求全」，臨尾仲嗌多一句黑暴港獨口號𠻹！

哇哇哇，神又係你，鬼又係你。做區議員月月袋3.5萬，仲有各種營運開支償還款額兼津貼。一班泛民區議員過去又唔做正經事掛住搞事，咁嘅筍工，蔡志強竟然講到「委曲求全」？既然咁委屈，點解又要做到宣誓一刻呀？醒目嘅網民幫你答喇。

網民：咁都要等到最後一日，果然有糧支最重要

網民：你白袋幾野，又唔做野，咪講到自己好偉大

網民：國安熱線呢一個小時非常繁忙， 你一路好走喇

監誓嘅民政事務局局長徐英偉隨即表示，蔡志強需要離任，唔會安排重新宣誓，又話政府會公布出席儀式嘅24位區議員中，有無人嘅宣誓有效性有疑問。如果涉及違法行為，會將個案交俾執法機構跟進喎。即係話，如果想用今日宣誓蒙混過關嘅區議員，都唔會得逞。譬如泛民35+初選案嘅兩名被告楊雪盈、彭卓棋，雖然今日有乖乖出席宣誓，但睇嚟都要自求多福囉。

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk