//如果真心服務街坊，一早就唔好辭職；如果唔想做，咪直接講明白啲，就唔使搞咁嘅笑料出嚟俾人寸囉。//

「好慚愧，自從返咗新工，完全冇理過地區工作！」於2019年區議會選舉以手寫政綱勝出而「紅極一時」嘅前油尖旺區議員陳梓維就咁講。政府將安排區議員宣誓效忠後，佢同二百幾個區議員一齊「跳船」辭職唔撈，之後轉咗送外賣。唔知係咪做慣高薪嘅區議員，一下子收入暴跌頂唔順，佢噚日就向街坊市民發出「最後通諜」。雖然字體錯漏百出，但勉強都理解到佢意思，係話要搞眾籌：如果24小時內籌夠20萬，專頁讚好人數超過1萬人，佢就要「強勢回歸」，再次服務街坊喎。如果失敗，就要停止地區工作。之後佢仲上載自己嘅銀行帳戶，不過睇到個結餘得番1355個幾，真係好淒慘喎。

陳梓維呢個另類嘅「最後通牒」一出，醒目嘅網民梗係唔受落喇，連一眾泛民及前區議員都留言寸爆佢喎。網民仲問佢「係咪可以用消費券啊」？另有網民留言說：「24小時籌20萬，擺明唔想做...」、「索性籌夠三百萬美金參加慈善啤王大賽把(吧)啦」、「佐敦南街坊有你係福氣，沒有你是福份」

今日24小時期限已過，陳梓維噚晚喺社交網站宣布眾籌失敗、「難敵天意」，今個月31號就係最後服務街坊嘅日子。不過仔細諗吓佢24小時籌20萬嘅目標都好難實現，如果真係有心服務街坊，一早就唔好辭職；如果唔想做，咪直接講明白啲，就唔使搞咁嘅笑料出嚟俾人寸囉。

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk