今日廣男一邊做嘢一邊聽直播，抱住花生友心態聽吓李慧玲講佢畀人炒魷魚單嘢，諗住聽下有咩料爆。一如所料，李小姐將被炒責任卸晒落人度，但佢所講既政府打壓，其實完全無證據支持，全部都自己既觀感，整個記者會自話自說，一邊話自己係新聞工作者（查實主持人係新聞工作者咩？商台新聞部都唔認啦！），但一邊又違反求真、求證既精神，矛盾非常。

記者會最大既亮點，就係李慧玲有意無意咁示範乜叫「砌生豬肉」。廣男冇屈佢架，呢位小姐所有證供都係得個「講」字，完全冇證據可言架，得佢一把口講晒架咋，OK，你話信不信由你，廣男就覺得，李小姐聲稱係「傳媒工作者」，理應識得傳媒守則ABC，拎唔出證據，只係因為憎特首梁振英就喺度未審先判，到底李小姐識唔識公義為何物架？識唔識公平兩個字點寫呀？

不過最搞笑係，李慧玲竟然坦白咁講咗唔少「佐證」說明自己點解「抵炒」。先唔好講其他，係人都知，上司、公司管理層係老闆，廣告客戶更加係老闆既老闆，李慧玲記招時自爆既得罪廣告客戶，又得罪高層，講真呢啲員工點會有運行吖。廣男唔係亂吹架，佢自己都承認，因為自己係時事節目主持，所以可以隨便批評自己上司，又話公司係廣播機構，所以要畀佢公開咁監察，簡單嚟講就係全世界都要畀佢鬧，咁神氣又咁型，真係畀人炒都抵返晒啦，係唔係先？

商台因為佢得罪廣告客戶同高層而炒佢，做得啱唔啱係一件事，李小姐係唔係畀人政治打壓又係另一回事，唔該分得清楚啲！

仲有呀，李慧玲既性格何只因為批評人叻，其實佢同公司講數都好叻，佢喺記招上自爆喎，公司要口頭警告佢，佢竟然可以令到公司「撤回」警告。咁做有乜用處呢？咪就係可以喺畀人炒時四圍同人講話「無人警告過佢」囉。廣男真係佩服李小姐，你連老闆警造你既機會都唔畀，公司又點炒你前先警告你呢？

一個鬧老闆、趕客戶，仲要同公司玩對抗既人，串咀都算啦，仲敢大搖大擺開記者招待會講自己連老闆都鬧，但因為「新聞自由」老闆都唔炒得佢，香江第一女惡霸，非李慧玲莫屬！

原圖：無線新聞截圖