香港第五波疫情持續嚴峻，新增確診個案屢創新高，染疫死亡的個案逐漸增多。正當整個社會都喺到努力抗疫嗰陣，總會有啲立心不良嘅人出嚟搞搞震，之前班走佬政客就成日鼓吹學西方「與病毒共存」，依家又輪到移居英國、公共醫療醫生協會前會長馬仲儀再講多次。馬仲儀接受美國政府代理人自由亞洲電台訪問，循例又係質疑港府防疫政策，話醫療系統服務緊張，仲出盡力推銷「病毒共存」，話要學英國同新加坡等地。但係囍雨想講，馬仲儀身為醫生無理由唔知道，「共存」係要用人命做代價。佢講呢番說話，係企喺政客角度講，抑話係醫生角度講，佢自己心知肚明啦！

中央助抗疫現曙光 香港不會行倒車

好多西方國家採取「病毒共存」，係因為根本無辦法「清零」，又要急於重啟低迷嘅經濟，只好放手去博一博，退守第二條防線，只求保住醫療系統唔會崩潰。呢一種只係消極且無可奈何嘅做法，美其名係「共存」，實際上係向病毒投降。香港依家疫情雖然嚴峻，但係中央全力協助抗疫，提供醫療人手、檢測設備同物資供應，加埋本地抗疫人員嘅努力同市民配合下，肯定可以再次控制到疫情。剛剛疫情先見到有望解決嘅曙光，竟然要行倒車搞「共存」，馬仲儀係咪有啲搞笑？係咪離開得太耐，已經唔知香港發生緊咩事？

囍雨從來都係對事唔對人，只不過馬仲儀由疫情初爆發到今日，一直都係歪理多多，真係無辦法唔駁斥佢。馬仲儀之前講過嘅「抗疫」主張，無論係當時定依家睇返，根本就錯到離譜。當初佢支持醫護罷工，強迫政府「封關」，先唔講運送物資糧食來港問題，單講罷工本身就嚴重影響公營醫院服務，連累到一眾病人受害；去年當局要求醫護人員打新冠疫苗，馬仲儀又企出嚟質疑疫苗成效，仲話決定唔合理云云。依家從第五波疫情睇到，各區醫院同診所都有醫生護士染疫，今日公布再有逾140名醫護中招，就證明到打針有幾咁重要。不過馬仲儀都幾醒目，去年移居英國行醫後都有打針，依家仲打齊晒三針，呢啲咪講一套做一套囉！

囍雨對於馬仲儀真係無咩好再講，都係嗰句啦，既然移居去英國，就記得唔好再返嚟啦，與其「關心」香港疫情，不如醫好英國啲新冠病人先啦。過去兩年多，大家都見到馬仲儀啲建議，真係靠害搗亂居多，依家轉為推銷「病毒共存」，仲邊到有人會信你呀？

原圖：RTHK

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk