新一屆立法會琴日舉行首場大會，以行政長官答問大會揭開議會新一章。今次答問會真係令人感覺耳目一新，議員們提出唔少尖銳嘅質詢，但係又不失理性務實，同特首嘅互動都可以相當有火花。特首今次能夠答到議員17條質詢，破晒歷年紀錄，答問會絕對可以用高效、流暢嚟形容。無咗反對派拉布、搗亂，議會終於回復本來應有嘅面貌，大家真係認真議事論政，想為香港好而為民發聲。新議會有新氣象，加埋特首又公布政策局改組方案，行政立法嘅大變局，相信會帶領香港走出新局面。

追回被耽誤了的十年

政策局改組呢樣嘢，其實不論係政界定坊間都好，其實都講咗好多年。但以往喺反對派拉布、刻意阻撓之下，當民生或無咩爭議性嘅法案，都隨時被拉死拖死，政策局要改組根本就難比登天。就好似上屆行政長官梁振英喺任內，宣布成立創科局都要過五關斬六將，決議三闖立法會先有幸通過；而上屆政府都提出要成立文化局，但「多得」反對派嘅拉布阻礙，終歸未能成事。就算今年香港順利設立到「文化體育及旅遊局」，都已經遲咗十年時間。正所謂人生有幾多個十年？依家立法會回歸正常，終於可以慢慢追返咁多年被耽誤咗嘅時光。

長掛國徽證議會有改變

以前拉布橫行嘅立法會，反對派議員係政治立場行先，基本上係逢中反必。無論係最基本嘅推行國民教育、屬於憲制責任嘅《基本法》23條立法，全部不問因由一律反對，再妖魔化抹黑，販賣恐懼。如果比著係以前，立法會會議廳長掛國徽呢件事，大家都可以想像到，以反對派嘅劣績，肯定會千方百計阻撓，可能唔止係拉布，甚至會用埋肢體衝擊或暴力方式阻止都未定，點會好似依家咁順利？ 

立法會能夠回歸理性務實，相信唔會再見到拉布亂象，絕對係香港人之福，未來政府終於可以集中精神，專注民生經濟發展。正因為係咁，大家應該向積極提出自己對政策嘅諗法同意見，可能係正面嘅，亦可以係建設性批評。囍雨都明白，近期反對派喺到危言聳聽，話批評政府可以會有違法嫌疑，大家都可能會有顧慮。但係大家可以睇到，其實近期唔少傳媒，以至一眾時事評論員都好積極比意見，質疑同批評政府嘅力度一啲都唔輕，一樣都無問題喎。只要出發點係想政府知道問題所在，原意係想為件事好，根本就唔使擔心咁多。香港未來掌握喺大家手上，想社會點樣發展走落去，就靠大家參與比意見，一齊編寫出我哋嘅未來！

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk