一個「無腰骨」政黨
一個「無腰骨」政黨

參選定唔參選?呢條咁簡單嘅問題,點解民主黨硬係拖泥帶水,點都唔肯講清楚?立法會選舉將會喺12月舉行,民主黨對於係咪參選,一直唔肯正面回應。拖完一大輪,日前終於開「特別會員大會」討論,結果一如囍雨所料,一樣係「側側膊」無答案。會後民主黨主席羅健熙就話,由於暫時未見有黨員表態想參選,「多名」黨員都認為暫時唔洗就參選立會與否作表決;但係就會設立參選「申請機制」,如果有黨員表態想參選,就會交比黨內中委會決定。囍雨覺得,民主黨咁嘅做法,等同將個責任推返落黨員身上,作為反對派「第一大黨」,竟然都無腰骨到咁,認真羞家。


繼續用「拖字訣」策略?


老實講,作為一個負責嘅政黨,係咪參選都好,背後有咩理據,都要同公眾交代清楚。依家民主黨又繼續玩「拖字訣」,拖到有黨員話想選,先至再開會員大會質詢參選人,先決定能否參選。換言之,只要無人表態參選,個問題就可以「不了了之」。點解民主黨到依家,對係咪參選都可以繼續無方向、無立場?如果黨員要自己揸主意,仲要千辛萬苦咁去說服其他黨員,咁點解唔退黨、用獨立身份參選?仲有喎,羅健熙仲話,新設嘅「申請機制」,門檻或者會比以往參選立法會地區直選高。民主黨係咪有心留難黨員,講到底其實唔想派人去選?


推卸責任到「參選派」身上


民主黨嘅做法相當取巧,一方面迴避參選問題,再將難題推卸落「參選派」身上,就連羅健熙都講明,若黨員有意參選,自己應該承擔更多,唔可能「個黨幫你鋪晒路」。囍雨都想知道,民主黨要求「參選派」有承擔,佢自己又負過啲咩責任?點解連參選意向都要含含糊糊?如果民主黨認為參選勝算唔高,或者對選舉制度有不滿,傾向唔想派黨員參選,點解唔可以坦白同大家交代,要喺到搞咁多嘢。不過又咁講,若然民主黨真係唔參選,自斷參政之路,到底仲有咩存在意義?不如直接解散咗佢啦!


囍雨想勸民主黨一句,假如仲想派人參選,真係要好好反省,檢視吓政黨路線同黨綱,能否符唔符合「愛國者治港」嘅要求。仲要畀社會大眾見到有誠意去改變,最起碼都要公開同反中亂港者割席、顯示維護國家安全嘅決心等。如果民主黨派連呢一點都做唔到,唔好話參選,政黨本身仲能唔夠繼續生存落去,恐怕都成問題。


請Follow我們的YouTube頻道:https://bit.ly/2kgU8qg


下載我們的手機應用程式,收看第一手精彩內容:https://www.speakout.hk/app


瀏覽我們的IG:https://www.instagram.com/speakout_hk/?hl=zh-hk

18
好正
6
心心眼
11
好好笑
3
令人傷心
3
嬲爆

評論

  • +85298****49
    +85298****49
    2月前
    0 回應
    Excellent
    • +85298****49
      +85298****49
      2月前
      0 回應
      Excellent
      • 龙一吟
        龙一吟
        2月前
        0 回應
        貪權正是元老級急需有一個這樣的人作頂住先。

        沒有更多評論

        沒有更多評論