自從《港區國安法》實施之後，反中亂港者再無作惡空間，反對派都要轉型搵出路。有人選擇退出政壇、亦有人移民「過新生活」，而「佔中三子」之一嘅中大社會學系退休副教授陳健民，就計劃「轉戰」台灣，去台灣政治大學做一年訪問教授，教「社會運動」同「當代中國」等嘅課程。囍雨想講，今次要真係祝台灣好運，陳健民之前用所謂「公民抗命」嘅歪理，扭曲下一代守法觀念，令部分年輕人視犯法如無物。依家佢去到台灣教社運，簡直就係教壞人，台灣嘅家長們要小心，你哋嘅仔女隨時被荼毒，話唔定做仲會做埋「抗爭義士」……

請公開「佔中」籌款帳目

反對派走吓一個、走吓又一個，依家再多一個陳健民，相信好多人都唔會有咩感覺。隨住「違法佔領」落幕，加上陳健民罪成入獄後，佢都已經無咩政治影響力，係走人定留低，其實都無咩大分別。不過又咁講，陳健民有權離開，但走之前係咪應該找咗數先？「佔中」期間留低嘅爛攤子，就算佢已經坐完監都好，唔係等於一筆勾消，佢仲有好多嘢要向公眾交代清楚！

唔知大家仲記唔記得，當年陳健民等人鼓吹「佔領中環」，又就行動籌款募捐，但佢哋嘅數簿就一直未公開，到底總共收咗幾多捐款？啲錢用咗去邊，餘額有幾多？又有邊啲人曾經捐過錢？其中有無外國資力嘅資金？呢啲問題，全部都仲未有答案，陳健民好應該向公眾，尤其係捐過錢畀佢哋嘅市民，好好交代清楚。

其餘的「老戰友」呢？

除咗「失蹤嘅數簿」，陳健民當初等人鼓吹「公民抗命」，煽動市民上街，唔單止引發咗持續79日嘅「違法佔領」，仲為之後嘅反修例暴亂埋下伏筆。大量年輕人被「違法達義」歪理洗腦，以為有訴求，就可以犯法，甚至用暴力方式去爭取；陳健民等人作為成件事嘅始作俑者之一，直接或間接累到咁多年輕人走上犯法嘅歪路，甚至身陷囹圄，依家仲去台灣教社運科？到底仲有無道德底線？

陳健民話要去台灣教書，話就話只係過去一年，到最後係咪真係會返香港，囍雨都真係有啲懷疑。仲有，陳健民今次要走，點解佢啲「老戰友」好似都無咩聲氣咁？先唔講仲喺獄中、被控涉嫌違反《國安法》嘅戴耀廷，相信佢短時間內都唔會有咩新搞作，都係等待進行司法程序；但係朱耀明牧師又點呢？最近都好似無聽到關於佢行蹤嘅消息，其實係咪都已經離港？又會唔會係去咗美國，同涉違《國安法》被通緝嘅兒子朱牧民團聚？相信大家要拭目以待。

反對派個別政客有本錢、有後路離開，但畀佢哋煽動而犯法嘅年輕人，或者就無咁好彩，可能要留案底、入獄前途盡毀，將來點唔點算。如果將來有人喺台灣見到陳健民，或者見到朱耀明，應該要問吓佢哋，到底有無感到過一絲內疚？有無諗過為自己過去嘅行為「找數」？

圖片來源：RTHK

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk