選唔選立法會好？未來政黨發展如何？對於係咪要參選立法會嘅問題，喺民主黨嚟講好似係個「永續」問題！明明質疑未來嘅選舉制度，講到「一分錢都唔值」咁，但係咪唔參選呢？又唔係喎，要再諗諗先！據傳媒報道，民主黨主席羅健熙接受訪問又提到相關問題，咁民主黨仲選唔選立法會？要等該黨喺9月中召開會員大會，到時先「扑槌」。廣男認為事情其實好簡單，選就一個字，唔選就兩個字，民主黨唔係連基本原則、立場都欠缺呀？
不斷質疑 但懸疑不決
睇《生果報》嘅相關報道，羅健熙就話北京話改制並非要喺立法會「搞清一色」，但另一方面特區政府就無放軟過手腳去打壓民主派，仲話「雖然目前唔多聽聞有黨員表示有意參選，但距離9月中仲有近五個月時間，相信可趁呢段時間畀黨友們討論一下」；然後講到自己被房委會建議暫停其建築小組委員會委員身份，佢就稱「如果房委會事前畀提示佢自行辭職，佢都會考慮吓，最終房委會只係出咗兩封信畀佢」，令佢覺得房委會嘅處理方式好差。用一句話去概括羅健熙嘅諗法，就係佢對政府諸多不滿！
先講羅健熙認為「民主派」被「打壓」嘅問題，問題其實好簡單，有人涉嫌違法，政府就要執法，喺呢方面就算係鼎鼎大名嘅反對派政客，都唔會有特權；廣男用另一角度睇，政府係咪要礙於反對派嘅政客身份而「唔做嘢」呢？至於佢話佢俾人建議暫停某公職一事，其實報道都有寫係因為「羅健熙因涉及一宗刑事案件」，佢會被停職，相信係政府慣常做法，唔通政府以至房委會又要「特別優待」羅健熙，等佢「體面地」自己辭職？
又是反對派延任的「翻版」？
老實講，民主黨今次嘅「參選意向」，同上年搞完民調之後作出「政治決定」而延任立法會議員極度相似，開頭質疑，之後要傾（甚至做埋民調），一場大龍鳳之後，就係決定繼續「做」立法會議員。今次民主黨會點，廣男唔知，但廣男想講，仲想選嘅話，咪直接講囉，搞咁多小動作，可能遲啲搞到自己仲肉酸呀！
圖片來源：民主黨社交網頁
請Follow我們的YouTube頻道：https://bit.ly/2kgU8qg
下載我們的手機應用程式，收看第一手精彩內容：https://www.speakout.hk/app
評論