打壓新疆棉花得不償失
打壓新疆棉花得不償失

近日內地網民發起行動,抵制曾經聲明拒用新疆棉花嘅外國知名時裝品牌,連同呢啲品牌有簽代言合約嘅內地藝人都紛紛「割席」。其實成件事係源於瑞士非政府組織「良好棉花發展協會」(「協會」、BCI),聲稱新疆存在「強迫勞動」,要求協會成員停用新疆棉花製品;但之後,「協會」上海代表處都有發聲明,話中國團隊從來都無喺新疆發現所謂「強迫勞動」事件;中國外交部亦有反駁過有關抹黑新疆棉花嘅失實言論。涉事企業都無去查證過真相,就要抵制新疆棉花,咁明顯係一大問題!如果外國企業繼續打壓新疆棉花,後果可能會得不償失!


成本上升 或失中國市場


立法會紡織及製衣界議員鍾國斌今日接受電台訪問時就提到,中國係全球第二大棉花產地,當中新疆棉佔中國85%出口量。如果企業由新疆棉花轉用印度或美國生產嘅棉花代替,成本就會上升,而為咗將成本轉嫁畀消費者,零售價可能要提高20%。唔單止製衣成本增加,仲有機會失去中國龐大市場,對拒用新疆棉花嘅企業會有好大影響。反觀中國生產棉花70%都喺國內自用,原本用作出口嘅30%,國內都應該可以自行消化,似乎都唔會有太大損失。


企業應該明辨是非


成件事最大問題係,外國企業拒用新疆棉花嘅原因,竟然係基於毫無事實根基而捏造嘅所謂「強迫勞動」謊言。其實新疆採棉工作一早已經實現咗高度機械化,新疆機械採集率達到約70%,根本就唔使大量人力工作;而且喺接近50日嘅採棉季之中,新疆採棉工平均每人都賺到過萬元人民幣。如果大家搞清楚呢啲事實,就會知道所謂「強迫勞動」嘅說法,其實基本上係根本冇辦法做到,第一,採棉要同時間鬥快,一旦過咗採棉最佳時期,棉農損失好大;第二,去過新疆或者睇過當地棉花田嘅人就知道,面積之大,唔係強迫幾多人力就可以完成得到。更何況,種棉採棉,已經成為新疆嘅扶貧產業之一,好多當地人其實係靠呢份工謀生計,甚至走上致富之路。


廣男借用時下一種說法,如果有人帶住有色眼鏡去睇嘢,咁就算再雪白嘅棉花,都會變成黑色。但問題係,外國企業喺抵制新疆棉花之前,有無先查證過事實?如果係因為一啲政客誤導而有誤解,唔緊要,但至少聽完,要自己再去求證下;中方同中國人民唔可以接受嘅,係有啲人一邊賺中國消費者嘅錢,一邊助長抹黑中國嘅謠言。經濟問題,就唔好扯去政治,如果有人想將經濟問題政治化,甚至想從中達至打壓中國、發動另類貿易戰嘅目的,到頭來,恐怕會自食其果。


圖片來源:新華社


請Follow我們的YouTube頻道:https://bit.ly/2kgU8qg


下載我們的手機應用程式,收看第一手精彩內容:https://www.speakout.hk/app


瀏覽我們的IG:https://www.instagram.com/speakout_hk/?hl=zh-hk

15
好正
2
心心眼
5
好好笑
1
令人傷心
1
嬲爆

評論

  • Happy21
    Happy21
    2年前
    0 回應 檢舉
    • Happy21
      Happy21
      2年前
      0 回應 檢舉
      :blush:
      • Happy21
        Happy21
        2年前
        0 回應 檢舉
        :+1:

        沒有更多評論

        沒有更多評論