民主黨打官司 想支持者找數?
民主黨打官司 想支持者找數?

最近反對派嘅眾籌此起彼落,有政客話要籌錢「打國際線」,又有政黨話出現財赤要市民「支持」;眾籌理由五花八門,但係目的只有一個,就係想大家捐錢「課金」。日前民主黨又有新搞作,話要幫之前被法庭裁定非妥為當選、被DQ嘅觀塘區議員洪駿軒籌錢上訴,同埋支付之前欠落嘅訟費,首階段就諗住眾籌100萬元。但係廣男就想問吓,點解民主黨要打官司,要搵支持者埋單?點解唔叫其他黨友捐錢「幫兄弟」,而要向市民埋手? 

 

失去議席與人無尤

 

洪駿軒話目前已欠落近百萬訟費,財政壓力好大,講到自己大學畢業一年半都唔夠,銀行戶口得五位數嘅存款,財政壓力巨大,所以需要搞眾籌。其實廣男想講,捐錢之前都要睇吓對方值唔值得幫,民主黨應該好清楚洪駿軒點解會比人DQ?

 

洪駿軒喺2019年區議會選舉期間,因為喺拉票傳單入面抹黑對手鄭強峰以「假獨立」誤導選民,被裁定違反《選舉(舞弊及非法行為)條例》,所以先會失去議員資格。既然今日嘅局面係自己一手造成,自然要自己承擔返後果,被DQ關支持者咩事?點解要其他人幫你打官司、畀訟費?依家民主黨仲話,如果上訴成功開支可能高達300萬元,即係之後眾籌仲會陸續有嚟?

 

民主黨對宣誓已經「有立場」?

 

洪駿軒仲要講到失去議席有幾唔甘心、上訴係「全香港市民嘅事」云云,但係佢想攞返個議席,保住自己份工,點解又要支持者出錢?咁樣點都講唔通啦。再者,如果佢真係對放棄議席咁唔甘心,即係代表洪駿軒好重視個議席;換句說話講,一旦佢拎得返個議席,理應會好好「珍惜」,所以佢應該會願意宣誓效忠?民主黨唔係啱啱先講完,話對區議員宣誓「未有立場」咩?點解依家啲成員已經有「決定」咁嘅?

 

廣男想講,睇返民主黨過去嘅眾籌,往績真係麻麻。上個月民主黨仲話要幫黨內30個「有案在身」嘅成員籌錢打官司,涉及嘅法律費可能高達逾千萬元。民主黨籌完一次一次,十足「無底洞」一樣,仲想人哋點支持落去?依家洪駿軒呢單上訴案,最後能唔能夠勝訴、埋單要幾錢都未知。不過上訴期間洪駿軒可以暫時保留區議員職位,就算輸咗都可能有人幫手找數,計落點樣都有賺!


圖片來源:洪駿軒社交網站影片截圖


請Follow我們的YouTube頻道:https://bit.ly/2kgU8qg


下載我們的手機應用程式,收看第一手精彩內容:https://www.speakout.hk/app


瀏覽我們的IG:https://www.instagram.com/speakout_hk/?hl=zh-hk

12
好正
0
心心眼
13
好好笑
0
令人傷心
9
嬲爆

評論

  • +85298****49
    +85298****49
    6月前
    0 回應
    Excellent
    • waiwai
      waiwai
      6月前
      0 回應
      仲繼續俾錢依班黃絲港獨搞亂香港嗎? 唔係呢班政棍推啲年輕人出嚟 香港就唔使搞到立立亂啦:rage::rage:

      沒有更多評論

      沒有更多評論