先禮後兵 政府給反對派議員「機會」
先禮後兵 政府給反對派議員「機會」

對於過去一多時間區議會嘅亂象,相信唔駛廣男多講,大家都「有眼見」,而坊間要求政府整頓區議會以至區議員嘅聲音亦越來越大;據報,政府因應《港區國安法》同全國人大常委會釋法修訂《宣誓及聲明條例》嘅研究進入尾聲,區議員被納入宣誓範圍嘅草案將於農曆新年後提交到立法會,當中傳媒傳出嘅「三不」內容,非常值得關注,廣男睇完媒體報道,認為政府絕對係俾機會一班反對派議員「改過自新」。


不追溯、不違刑事、不與立會誓詞不同


據多間傳媒引述消息指,今次修例主要內容有「三不」,包括不設立追溯條款、不會列明違誓嘅刑事後果同埋誓詞不會與立法會議員誓詞有差別;同時,條例將會列明由特首指定人員負責監誓,以保留一定彈性。廣男覺得當中最值得留意嘅內容,就係不設追溯,即係反對派議員過往做嘅一切,極可能一筆勾銷。


回想過去一段時間,喺今屆區議會開初,已經有區議員集體喺區議會唱「獨歌」,之後《港區國安法》生效,仲有區議員喺辦事處掛「港獨」旗,又有區議員去中大參與有人高舉「港獨」標語嘅非法遊行;以上事情,做任何一件都足以被認為係唔擁護《基本法》、唔效忠特區,如果特區政府推出嘅區議員宣誓草案真係寫明不設追溯力,即係話特區政府係俾緊機會呢班「獨」議員。


反對派議員要收斂


既然如此,剩返嘅問題,就係政府俾晒機會,一班反對派議員係要有所收斂呢?喺「出糧先於一切」嘅情況下,廣男相信「九成九」甚至全部反對派議員都會宣誓,但佢哋同時要知道,如果宣咗誓但又違誓,例如做出對特區不忠或不擁護《基本法》嘅行為,咁佢哋就唔係俾政府DQ,而係俾自己DQ!


其實,區議員要擁護《基本法》、效忠特區,只係區議員作為公職人員嘅基本要求,如果有人一心係要反政府、反中央甚至有顛覆之心,廣男建議呢啲反對派議員唔駛「委就」自己,大可以辭去區議員一職,回到街頭做個「抗爭鬥士」,唔好一邊出政府糧,一邊又要「擦邊球」。若然有反對派議員唔知點應對好,廣男建議佢哋可以參考下民主黨「區議員」林卓廷嘅建議,順便按照林卓廷嘅意思睇下已經存在嘅《國安法》。 


圖片來源:RTHK


請Follow我們的YouTube頻道:https://bit.ly/2kgU8qg


下載我們的手機應用程式,收看第一手精彩內容:https://www.speakout.hk/app


瀏覽我們的IG:https://www.instagram.com/speakout_hk/?hl=zh-hk

14
好正
7
心心眼
8
好好笑
4
令人傷心
4
嬲爆

評論