近期，關於特首嘅產生辦法，坊間有好多討論，有社會人士認為特首如果根據《中英聯合聲明》或者《基本法》第45條而由協商產生，英國唔可以話違反《聲明》，於是有官員、行政會議成員以至攬炒派政客都回應事件。今日，囍雨睇《生果報》，見到攬炒派元老級人馬、資深大律師李柱銘都加入「戰團」，撰文稱「特區政府嚴重缺乏認受性，如今非但普選最終目標落實無期，居然還要倒退至協商產生特首的話 …」，言下之意，係講特首要協商產生係「倒退」；囍雨想指出，如果特首有一日真係由協商產生，唔理係進步定係「倒退」，根本都係攬炒派一手造成！
信法律 還是信李柱銘？
喺李柱銘呢篇題為《選舉大躍退》嘅文章，綜觀其行文邏輯，頭段大抵係話「在《基本法》的起草過程中，協商產生特首的方式早已被排除」；對於李柱銘講嘅「歷史故事」，囍雨唔敢話係假，只能夠講由攬炒派政客講出嚟嘅「故事」，有待商榷。問題嘅重點，在於我哋要信李柱銘嘅「故事」，定係信《聲明》以至《基本法》條文呢？當中講到明特首可以係「選舉或協商產生」。如果協商特首嘅方式已經排除，一個最簡單嘅問題，就係做乜仲要寫落《基本法》呢？
不論係李柱銘定係其他攬炒派政客，都好鍾意強調特首選舉無或者唔夠「認受性」，囍雨又有問題喇，依家特首由代表各界嘅選委投票選出，再由中央任命，攬炒派話無認受性；幾年前，特區政府推出政改方案，當中有《基本法》列明嘅提名委員會，攬炒派話係「假普選」；進一步講，就算符合《基本法》嘅政改方案通過，由於係用提名委員會提名而非攬炒派提出嘅「公民提名」再普選特首，攬炒派其實一樣會話「無認受性」，咁協商、依家方式以至有提名委員會嘅普選特首方式，對攬炒派而言有分別咩？囍雨覺得無，因為攬炒派係「點都要鬧」。用另一角度睇，如果攬炒派想選舉有進步，當年又做乜要否決政改方案？
選舉或被「鍊爆」
囍雨必須指出，之所以有特首選舉可以由「協商產生」嘅討論，完全係因為政治環境改變，而政治環境嘅改變，則在於攬炒派近年除咗想癱瘓政府，直頭係想「奪權」甚至去中央化；喺呢個前提底下，如果有人想借特首選舉「奪權」，社會以至中央，都唔可能被動。最後，說到「倒退」，黑暴運動破壞社會、破壞文明，一場欲令香港倒退成蠻荒世界暴力社會嘅「運動」，點解又唔見李柱銘批評一下？呢種選舉要進步但否決政改，社會要法治但又支持黑暴違法嘅邏輯，囍雨實在「想唔透」！
原圖：rthk
請Follow我們的YouTube頻道：https://bit.ly/2kgU8qg
下載我們的手機應用程式，收看第一手精彩內容：https://www.speakout.hk/app
評論