攬炒派其中一條反政府「方程式」，就係發生事情，第一時間就係籌錢，話要用啲錢為受害人同政府「打官司」；囍雨以為「財雄勢大」嘅教協唔需要咁做啦，點知教育局宣布取消一名散播「港獨」嘅教師註冊之後，教協都係玩籌錢，話要「眾籌協助被DQ教師」，果然充滿攬炒派作風。有人質疑，教協唔罷工、唔集會係「Hea做」，囍雨就質疑，教協借機籌錢，到底係同教師「同行」，定係同金錢「同行」呢？教協點解唔為被荼毒嘅小學生發聲呢？
教協「食相真難看」
為咗令大家能夠好好感受下教協嘅「正義」，囍雨喺度先分享一段關於佢搞眾籌嘅說法：
「教育界現正面臨風高浪急的時刻，對教育界的攻擊及打壓將接踵而來。教協作為教師工會，今年初成立訴訟及緊急援助基金，為多位受政治迫害的教師提供直接援助。因應現時情況，預計所需援助費用將不斷上升，教協呼籲社會人士及所有教育工作者守望相助，團結一致，支持眾籌，為教師提供法律援助及緊急經濟援助。」
對於教協嘅眾籌行動，囍雨認為唔少網民非常心水清，有網民表示「家長都等咗老師罷課好耐，得未？」、「前幾日傳聞教協眾籌 果然係真嘅」、「騙徒手法來來去去都係呢招！」，簡而言之，就係教協俾人質疑「無料到」，甚至有「騙財」之嫌；如果你問囍雨，囍雨當然唔會話教協呃錢，但呢頭教師被DQ，教協轉頭就即刻籌款，用返市民批評攬炒派議員為延任耍花招果句，真係「食相很難看」！
為何不闡明「港獨」問題
教協包庇失德教師，其實已經唔係咩新聞，只係今次事件，涉及有教師宣傳「港獨」訊息，甚至涉及「藏獨」、「疆獨」、「台獨」，點解教協一味喺度轉移視線，而唔詳細評論下，教師同小學生「傾港獨」，係咪一啲問題都無呢？調番轉咁講，如果個教案、教學材料係叫小學生支持中央政府，教協又會唔會話教師、學校玩政治洗腦？
教協唔正視問題核心，算喇！不過就算係攬炒派支持者，囍雨都想叫你哋唔好對教協「寄望太多」，點解？因為教協係傳統、保守且「貪生怕死」嘅攬炒派「工會」，你想教協搞罷工聲援涉事老師？恐怕唔會！想教協激烈抗爭？更加唔會！佢哋最多最多，就係攞市民錢去「打官司」；贏又好，輸又好，總知教協就係無輸過，失德教師繼續被釘牌，而教協諸如葉建源呢？梗係繼續逗住立法會份糧，兼一邊攞光環啦！以為教協認真？「認真你就輸了」！
圖片來源：教協FB、RTHK
請Follow我們的YouTube頻道：
下載我們的手機應用程式，收看第一手精彩內容：
瀏覽我們的IG：https://www.instagram.com/speakout_hk/?hl=zh-hk
評論