根據教育局7月公布嘅數字，局方一共接獲222宗教師涉專業失德嘅投訴，但係公眾對個案資料所知甚少，到底失德教育姓甚名誰，喺邊間學校任教，甚至涉案情節等，大家都係一無所知。今日「803 基金」向高等法院申請司法覆核，要求法庭推翻教育局決定，下令局方公開有關教師投訴嘅相關資料。廣男想講，「803基金」出手捍衛學生同家長嘅知情權，真係做得好啱！

教育局堅拒公開失德教師名單

「803基金」喺申請書入面提到，原來今年二月及五月已經試過向教育局發信，申請索取與教師專業操守有關嘅相關資料，包括被裁違反操守嘅教師姓名及其任教學校名稱、相關調查結果及後續行動等。最終教育局嘅回覆，都係講啲籠統嘅統計數字，個案詳情隻字不提，甚至講明拒公開資料係為免破壞教師同學校對教育局嘅信任，或會令政府違反保密責任嘅法律風險等。簡單嚟講，教育局就係點都唔肯公開失德教師嘅資料，「803基金」先至決定會申請司法覆核。

外國早有先例 何難之有？

廣男一直都唔明白，教育局公開失德教育資料有咩問題？外國處理失德教師嘅投訴就透明得多，例如喺英國，如果當局一旦決定展開對教師投訴嘅調查，就會公開涉事教師姓及同所屬學校名稱，紀律聆訊更加係公開俾公眾旁聽。美國佛羅里達州和澳洲昆士蘭都有類似措施，點解人哋又無私隱方面嘅憂慮？理由好簡單，因為教師被投訴，無論係顧及大眾嘅知情權，或者學生嘅利益都好，個案資料都好應該被公開，唔能夠收收埋埋。學校入面有失德教師存在，但家長同學生一直蒙在鼓裡，咁仲講得過去嗎？

教育局應該好好正視問題，點解想拎失德教師資料都困難，甚至要被迫對簿公堂，提出司法覆核？教育局局局長楊潤雄曾解釋過，公開失德教師名單會對教師同學校都唔公平，應該俾機會涉事教師作出改善，但係咁樣對學生家長又公平咩？如果教育局唔係「避事」嘅話，唔該行前一步，主動公開失德教師名單，即使咁做面對攬炒派或者教協挑戰，都絕對值得去做。

圖片來源：RTHK

請Follow我們的YouTube頻道：

https://bit.ly/2kgU8qg

下載我們的手機應用程式，收看第一手精彩內容：

https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk