香港警方噚日宣布修訂《警察通例》下有關「傳媒代表」嘅定義，攬炒派政客同媒體即刻變成嗜血鯊魚，群起而攻之。《生果報》指摘相關修訂等於變相「由政府新聞處發牌」、記協主席楊建興批評警方「封殺網媒、學生記者」、做過記者嘅立法會議員毛孟靜批評警方「自行權力膨脹」、「打擊新聞自由」…囍雨唔客氣講句，呢啲指摘、批評，簡直係侮辱咗「記者」兩個字同「新聞自由」嘅真正意義！
先同大家講兩件真人真事…今年5月，美國黑人弗洛伊德懷疑被警員跪頸致死事件，引爆美國民眾大規模反警暴、反種族歧視示威騷亂，期間有路透社記者喺採訪過程中，懷疑被美國警察射出嘅橡膠子彈射傷左眼；有美國CNN一名黑人記者喺直播示威活動期間，被警方鎖上手銬帶走。但囍雨冇聽過毛孟靜、楊建興當時企出嚟講過一句「美國警察殘害記者、打壓新聞自由」。
再講一例。記得前排有部電影，將英國《星期日泰晤士報》美籍戰地女記者瑪麗·科爾文（Marie Colvin）嘅傳奇一生搬上大熒幕。戰地採訪，唔需要「攞牌」，你夠膽闖越槍林彈雨，呢份勇氣同膽量已經係「通行證」，2001年，科爾文喺採訪斯里蘭卡內戰中，被手榴彈碎片奪去左眼，從此，佢果副獨眼眼罩就成為咗受人尊敬嘅標誌；2012，科爾文喺敘利亞嘅戰場上殉職。佢用一生致力追尋戰火背後嘅真相，但囍雨從未聽聞過，佢用「記者」、「新聞自由」之名為自己當護身符。
新修訂對正當媒體無影響
睇完故事，請大家再諗下，記者、新聞自由，係咪如攬炒派所演繹嘅果種概念？再撫心自問，係咪一個十二、三歲嘅「𡃁仔𡃁妹」揸部手機、喺社交平台開個專頁、著件黃背心都可以叫「記者」？係咪直播粗言穢語都叫「新聞自由」？對女警性騷擾都係「報道」？有「易服記者」喺示威現場突然「自行倒下」，又係咩玩法？
所以囍雨唔明白，當香港嘅「黃背心」亂象不斷氾濫，氾濫到「記者」多過警察甚至多到可以包圍警察時，警方依家權衡利弊輕重之下修訂「傳媒代表」定義，一來針對打擊假記者，二來保障真記者、真傳媒嘅專業工作，究竟有咩問題？！當黑暴分子將香港街頭變成打砸搶燒嘅「戰地」，警察就要出手平亂；當警方過去已經三番五次呼籲傳媒採訪期間保護自身安全、保持安全距離，都仲不斷有一層層「黃背心」擋喺警方前面、對警方執法綁手綁腳時，囍雨又想問下楊建興、毛孟靜以至《生果報》，你想警方修訂「傳媒代表定義」好，定參照「美國標準」修訂「執法武力」好？
如果行得正、見得光 又使乜驚？
換個角度睇，如果警方修訂「傳媒代表」定義，能夠有效排除假記者、假媒體干擾，咁除咗警方執法更加便利之外，最起碼仲有兩個好處，一係令正當嘅新聞傳媒有更理想嘅採訪環境，正正係保障合法嘅新聞自由權利；二係令青年、學生遠離混亂場面。至於新措施係咪「變相政府發牌」？囍雨只係想反問一句，如果真係行得正、企得正、見得光，又使乜驚註冊成為「政府新聞處新聞發布系統」（GNMIS）」嘅媒體呢？
原圖：警方fb
請Follow我們的YouTube頻道：
下載我們的手機應用程式，收看第一手精彩內容：
評論