人權組織又係抹黑警察?
人權組織又係抹黑警察?

所謂國際人權組織「人權觀察」日前發表年度報告,一如所料,報告相當著力於攻擊中國政府同香港特區政府,仲特意稱「香港警察限制集會自由,並向示威者使用過度武力」,表示香港自由「岌岌可危」云云。囍雨就認為,呢啲所謂國際組織,係咪應該先搞清楚,到底係咩人使用過度武力?係咩人令到香港自由岌岌可危?如果暴徒打砸搶燒無人譴責,警察執法就被人攻訐,咁以後執法部門仲點做嘢呢?


外交部:報告罔顧事實、顛倒黑白


對於「人權觀察」以至「自由之家」發表嘅「報告」,中國外交部發言人耿爽回應時講明相關組織長期戴住有色眼鏡睇中國,佢哋發表嘅報告一向罔顧事實、顛倒黑白,毫無客觀性可言,完全不值一駁。囍雨覺得耿爽講得相當之有道理,尤其係一句顛倒黑白,更加係說穿了「報告」嘅本質。


暴徒施暴 警方執法


當「人權觀察」稱警察使用過度武力嘅時候,囍雨覺得呢啲外國組織首先要明白,到底武力「從何而來」。呢七個多月以嚟,暴徒四圍打砸搶燒,市民被圍毆「私了」,有暴徒用磚頭「掟死」老伯伯,有暴徒用易燃液體淋向市民兼點火燒到人危殆;警方面對不斷升級嘅暴力,根本就無可能唔動用武力執法!事實上,警察喺過去幾個月亦成為暴徒襲擊目標,有警員被潑腐蝕液體受重傷;有警員甚至被暴徒用鎅刀割頸「意圖謀殺」,如果警方喺呢啲極端情況下都唔用武力執法,咁香港真係會俾暴徒「統治」。


至於自由嘅問題,囍雨唔知道「人權觀察」有冇真正了解過香港情況,香港本來係一個非常自由嘅城市,過去幾個月之所以「少咗」自由,係因為暴徒四處破壞,令到市民放假唔敢出街,或者放工都要「早啲返屋企」;警察有冇限制自由呢?如果警察係因為暴徒暴行而暫時唔批准公眾集會或者遊行,咁影響港人自由嘅,明顯係暴徒先啱喎!


老實講,囍雨覺得諸如「人權觀察」呢啲組織,唔止係戴住「有色眼鏡」睇中國咁簡單,佢哋直頭係不斷搵機會針對中國;而香港作為中國一個特區,一個容易俾外國勢力干預嘅地方,「人權監察」等組織亦好自然會「借香港搞中國」。之但係,一味偏幫暴徒、攻訐港府同警察,公平咩?


圖片來源:中通社


請Follow我們的YouTube頻道:

https://bit.ly/2kgU8qg


下載我們的手機應用程式,收看第一手精彩內容:

https://www.speakout.hk/app

10
嬲爆
0
超無奈
0
無意見

評論