「香港眾志」是知錯能改 還是為了選舉?
「香港眾志」是知錯能改 還是為了選舉?

曾經有人講過,世界上唯一不變嘅,就係「變」,就好似歌仔有唱「知否世事常變 變幻原是永恆」一樣;可能因為廣男以前年紀小,唔係太明白當中道理。但隨住年齡漸長,尤其睇咁多「沒有最荒謬,只有更荒謬」嘅政治新聞後,廣男就發現原來「變」先係永恆;好似出咗名Sell「民主自決」嘅「香港眾志」咁,一直以嚟都堅持「民主自決」(好多人解讀為「暗獨」),但最近竟然發聲明放棄「推動香港民主自決」嘅宗旨,改為「推動香港的民主與進步價值」。見到「眾志」有咁大轉變,廣男真係想問清楚「眾志」成員包括黃之鋒同周庭,佢哋係「覺今是而昨非」,定係為咗走入「建制」參選,所以連宗旨甚至原則都放棄呢?

 

不再鼓吹「自決」?

 

為免喺轉述上有任何誤會,廣男喺度將聲明當中相關部分原文照錄,等大家參詳下:

 

香港眾志於2020年1月8日召開成員大會,通過決議更改組織章程,組織設立的宗旨將由「推動香港民主自決」改為「推動香港的民主與進步價值」。是次綱領改動令其更概括闡述眾志的工作方針以及計劃,聚焦於強化公民社會、團結民主力量、推動進步價值,進一步鞏固香港民主運動的根基。


基本上,睇「眾志」呢個聲明,佢係無講到俾大家聽,點解佢哋要放棄「民主自決」嘅宗旨嘅;廣男喺度作出一個估計,就係佢哋之所以表面上放棄「民主自決」理念,唔係佢哋真係唔想繼續煽動「民主自決」,而係佢哋嘅成員包括周庭、黃之鋒一個又一個因為「民主自決」理念而被DQ,唔能夠參選區議會甚至立法會,佢哋為咗將來可以「走入建制」參選,就寧願放棄自己對支持者承諾嘅爭取「自決」,變成「推動香港的民主與進步價值」。

 

一切為了參選?

 

但係咁,「眾志」將門面嘢改一改「換件衫」,同佢哋係咪仲宣揚、爭取緊「民主自決」,係兩回事;所以將來就算佢哋無再喺章程、組織網站等地方講「民主自決」,佢哋想再參選,選舉主任以至社會,都一定要問清楚佢哋係咪仲支持「自決」,甚至要問清楚佢哋係咪反對「自決」。否則,個個「獨派」或者疑似「獨派」公開講句唔再倡議或推動「港獨」、「自決」就可以「入閘」,咁《基本法》等要求咪會變成一紙空文?

 

當「眾志」喺社交平台公布有關消息後,有唔少網民喺佢哋平台留言,其中有網民稱「眾志」連「自決都無埋 其實同泛民無咩分別」,廣男覺得有關說法相當有道理。其實,「眾志」一邊煽動抗爭,一邊又唔會去衝,然後又喺修例風波抽盡政治水,一早已經同傳統盲反派無分別啦!


原圖:rthk


請Follow我們的YouTube頻道:

https://bit.ly/2kgU8qg


下載我們的手機應用程式,收看第一手精彩內容:

https://www.speakout.hk/app

2
唔係呀哇
1
嬲爆
17
搞笑咩

評論