呢排好多錶舖、金舖比匪徒打劫，搞到好多商舖都「人人自危」。廣男前排喺九龍區行街，「循例」去睇下男士最愛嘅手錶，發現咗個「古怪」現象，就係平日睇錶錶舖都會將啲靚錶展示出嚟，但日前去到某錶舖睇錶，發現一個本身擺錶嘅位置，變咗一個「播映手錶」嘅大電視，市民、顧客想睇靚錶，只能夠「睇電視」，感覺好似上網購物一樣。呢啲商戶為自保而盡出奇謀嘅表現，好明顯就係因為黑暴令治安變差，匪徒趁火打劫嘅結果！
近日發生多宗劫案
據傳媒報道，自八月以來，最少發生咗15宗涉及錶舖同金行嘅劫案，有錶行更加喺短短一兩分鐘之內，比匪徒打劫咗價值數十萬嘅名錶；為求自保，唔同商舖都採取唔同措施應對，包括唔再展示商品實物、謝絕戴帽同口罩者入內、顧客要睇圖睇「心頭好」等等。一句講晒，就係為免被打劫，本來高調展示貴價品嘅商舖，都要變得「低調、保守」。
對於近期接二連三發生呢啲劫案，如果話唔關黑暴運動事，真係講出嚟都無人信；喺警方相當部分嘅警力用於應付示威騷亂嘅時候，本身用嚟巡邏、打擊其他罪案嘅警力自然亦被迫減少，警力分散咗，就自然有人趁火打劫。事實上，啲店主要及早預防、分辨賊人相當有困難，因為依家一街都係戴口罩嘅黑衣人，啲店主可能要到真係比人打劫，先知道原來「企喺門口果個就係賊」！
商戶雪上加霜
呢六個多月黑暴運動肆虐，商戶做生意本身已經難，加上依家被打劫嘅風險大增，做生意就更多難。廣男喺度諗，賣貴價品、奢侈品嘅商舖，本身就係擺啲貨品係櫥窗吸引顧客，依家佢哋唔可以將貨品擺喺櫥窗，咁點做生意？呢種擺貨出嚟怕俾人搶，唔擺出嚟又怕做唔到生意嘅兩難情況，確實令部分商舖相當困擾。
黑暴運動一日唔停，商戶以以至基層打工仔，一日都「無啖好食」；所以，如果其他市民想香港盡快回復原狀，應該不分政見、顏色，一齊發聲譴責黑暴。示威者、暴徒有政治訴求，唔係佢哋打爛人飯碗嘅理由，將香港搞到治安惡劣，得益嘅只有想趁火打劫嘅匪徒。喺剛過去嘅聖誕，已經有好多商戶俾示威者搞到無啖好食，示威者、暴徒依家到底係想表達政見，定係想搞死香港，大家都要睇清楚！
圖片來源：RTHK
請Follow我們的YouTube頻道：
下載我們的手機應用程式，收看第一手精彩內容：
評論