過去一週，暴徒暴力完全邁向恐襲級別，有暴徒向裡面有乘客嘅港鐵站掟汽油彈、街頭出現爆炸品，警員執勤被暴徒用𠝹刀「割頸」；掟雜物到鐵路路軌；明明暴力已經去到絕不能接受嘅程度，但個別政客同埋媒體仲係「睇唔到」咁款，一味攻訐政府同警察。今日廣男睇新聞，見到《生果報》盧峯有篇社評稱「警謊」如「癌細胞」，成為「社會大患」云云。廣男實在好奇，到底依家咩人先至係社會大患，係執法嘅警方，定係下下想「謀殺」警察嘅暴徒？定係一直煽動暴徒嘅傳媒？定係至今仍拒與暴力割席嘅盲反派政客？

一定是警方的「錯」？

其實唔駛廣男引用盧峯嘅內文，大家都估到《生果報》一貫嘅作風，就係不問暴徒「對錯」，將責任推卸晒俾政府、警方就係喇；但盧峯呢篇文所講嘅一啲「例子」，廣男就覺得有啲自打咀巴喇，例如佢花咗相當篇幅去講一位中大女生話自己被警察「性侵」一事，大家了解相關新聞嘅來龍去脈，都知道該名女生明明喺同校長對話當日仲聲稱自己「我入過瑪嘉烈醫院、葵涌警署、新屋嶺」、「你知唔知道新屋嶺個搜身室係全黑？」、「你知唔知道唔止我一個遭受警方性暴力？」，但之就改話自己「事發」於葵涌警署，到底佢係新屋嶺受害人？葵涌警署受害人？定係件事另有內情？點解盧峯唔評論一下？

襲警暴徒係「武俠」？

至於邊個先係「謊」，或者邊個先至社會大患嘅問題，廣男想請大家睇下《生果報》一條即時新聞，題目為〈旺角「武俠」起飛腳踢防暴警頭盔 勇救手足〉，呢單新聞將襲警、搶犯及企圖搶槍嘅違法行為，形容為「勇救手足」，甚至將襲警暴徒形容為「武俠」，暴徒起飛腳只係踢頭盔。《生果報》呢啲叫唔叫講大話、謊話？如果《生果報》咁都唔係說謊，廣男或者其他市民係咪應該話《生果報》將違法行動「武俠小說化」？

日前睇新聞，廣男見到一單新聞非常「有啟發性」，事緣藝人馬蹄露喺旺角舉機拍攝暴徒施暴被毆，當時澳洲「7 News」記者Robert Ovadia上前採訪馬蹄露，了解事件再陪同馬蹄露去報警；事後Robert Ovadia喺社交平台直指虛假信息被「武器化」，表示《生果報》嘅相關影片經過剪輯，令馬啼露睇落去似係先攻擊示威者。睇到呢單新聞，再睇下《生果報》近月表現，邊個說謊，邊個係社會大患？大家應該好清楚啦！ 

原圖：文匯報

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app