港府為止暴制亂訂立《禁蒙面法》，引發黑衣暴徒強烈反彈，過去幾日嘅暴力事件、血腥場面，相較以往更加有過之而無不及，相信大家都已經睇得好明白，現時一切禍害嘅根源，就係因為有一班無法無天嘅黑暴勢力不斷侵蝕香港嘅機體。但呢個所有正常人都明白嘅是非觀，偏偏喺盲反派喉舌《生果報》口中就完全顛倒嗮。囍雨今天睇到《生果報》主筆盧峯又寫咗篇「蘋論」，講到香港依家咁嘅局面，一切都係因為政府錯、警方錯、教育局錯，好似全世界只有黑衣暴徒最啱咁，囍雨真係要問，呢啲係咩歪理？！《生果報》顛倒是非黑白嘅能力真係令人嘆為觀止！

別人都錯 只有暴徒啱？

例如盧峯講到出台《禁蒙面法》只會為社會「添煩添亂、加劇矛盾、令局勢火上加油」；又等於向全港學校散佈「白色恐怖」，而教育局要求校方呈報校內戴口罩、缺課、組人鏈情況，等於「變相政治審查」；跟住又「例牌」批評警方執法係「令局勢紛擾混亂嘅主角」，《禁蒙面法》「令警察更容易濫權濫捕」等等。而囍雨覺得最離譜嘅係，盧峯甚至連暴徒「私了」市民，都可以講到係因為《禁蒙面法》而「頻率大增、更激烈」、仲話有支持平亂嘅市民「結果反被黑衣抗爭者毆打至頭破血流」。講真，睇完盧峯筆下所描述嘅「現狀」，囍雨都幾乎有錯覺，仲以為香港原本就係一個黑暴統治下嘅世界，而政府立法止暴、警隊執法、市民要求平亂反而係「大逆不道」咁。

黑暴統治香港？

冇錯啊！香港的確曾經有過一段罪惡勢力橫行嘅黑暗時代啊！倒退四、五十年，當其時嘅香港到處都係勒索、搶、燒、打、砸，唯一「被關在魔盒」中嘅就係法治。時過境遷，經過幾代人嘅努力，香港終於建立起法治、文明超卓嘅國際都市，但今時今日，喺一場黑色恐怖籠罩之下，香港又係點？店鋪被搶、銀行被燒、港鐵被癱瘓、市民被暴打、警察被掟汽油彈，尤其甚者，仲有黑衣暴徒設路障截車、查證，「行使」佢哋果套「誰大誰惡誰正確」嘅霸道「王法」。囍雨請問《生果報》、盧峯，對呢啲暴行有冇譴責過一句？呢啲係咪你哋筆下想要宣揚嘅黑暴統治世界？囍雨又要問大家，係咪想見到香港變成咁？

囍雨好明白，對住《生果報》其實已經冇乜道理講得通，但囍雨好希望廣大市民可以明白，政府立法為咗止暴制亂、警方執法係為咗恢復秩序，而當現時不斷有罪惡黑手伸向校園、毒害我哋下一代時，教育局配合新法了解學校情況，目的只有一個，就係保護孩子、保護學生遠離暴力、遠離違法。香港百年基業嚟之不易，但要毀於一旦就好容易，如果大家唔想重返法治不彰嘅黑暗時代，唔想生活喺《生果報》盧峯所宣揚嘅黑暴世界，就請大家堅定支持政府、警隊依法止暴制亂，話畀暴徒知，香港唔係佢哋為所欲為嘅地方！

原圖：大公、文匯

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app