醫護界發聲 政治勿介入專業
醫護界發聲 政治勿介入專業

暴徒暴力係咁升級,呢兩日除咗街頭毆打市民之外仲有暴徒「不斷」直接將汽油彈掟向警員,分分鐘搞出人命;本來社會各界都應該一致譴責暴力,但社會偏偏有啲人支持暴徒,甚至利用專業界別嘅名義「撐暴力」。正當大家以為沉默大多數被壓下來嘅時候,有超過500名醫生同護士喺報章刊登全版廣告,發表聯署信支持警方依法執行職務、維護法紀,仲表明唔應該美化或鼓吹暴力衝擊,並對任何違法行為堅決說不等等。廣男就覺得,今次醫護界發聲,絕對係好事,既有助叫停暴力,亦帶出一個重要訊息,就係唔好將政治帶入專業,繼而影響到醫護工作。


對社會亂局深感悲痛


今次有份聯署嘅包括眼科醫生兼全國人大代表林順潮、港大深圳醫院院長盧寵茂等人,聯署信表明對社會亂局持續未平深感悲痛,對於有人以醫療界名義公開支持放棄起訴暴力示威者,聯署人士更表明呢啲聲音唔代表整體意見;聯署信又提到,借反修例為名嘅非法暴力有增無減嚴重挑戰香港法治,警察被妖魔化,有市民對政府、警察以至公營機構產生不必要嘅仇恨情緒,引發年輕人對法治嘅藐視,呼籲醫護同仁對病人唔應該因患者政見、職務或背景而有不同,又願香港盡快重回正軌。簡而言之,一班聯署嘅醫護人員認為暴力示威破壞法治,而政府、警察就遇到不必要仇視,甚至被醫護「同仁」針對。


對於醫護界積極參與或者就政治事件發聲嘅時候,醫護人員首先要做到不問政治立場,一視同仁地對待傷者,唔能夠因為對方係示威者或者警員,就作出唔同嘅對待。另一個重要原則,就係醫護人員亦唔應該「未醫先判」,例如見到示威者受傷,就認為一定係「警暴」,而忽略事件嘅前因後果;最簡單嘅例子,就係如果有示威者先動武或者破壞到社會秩序,警察使用適當武力制服、拘捕涉事人士其實係無可避免。


醫護、市民都應該與暴力割席


今次有醫護界人士同暴力割席,算係一個唔錯嘅開始,因為種種新聞出現,令外界都以為醫護界「反警察、撐暴徒」,依家佢哋發聲,一證明咗反暴力嘅聲音越嚟越多,二則係醫護界都發聲,其他界別、其他市民係咪都可以發多啲聲,一齊反對暴力呢?近期不斷有人重複強調「警暴」,如果有人反對警方用武力對付示威者,佢哋係咪都應該同時叫停示威者、暴力,而唔係喺度玩「雙重標準」呢?


廣男就覺得,社會各界唔應該再沉默,所有反對示威者、暴徒暴力嘅市民,包括一向立場較為中間嘅市民同社會持分者,都應該為發聲制止越嚟越過分嘅暴力;激進示威者、暴徒以為市民係佢哋嘅強大「後盾」,各位更應該出聲,話俾佢哋聽社會反對暴力,請佢哋立即止暴!


原圖:RTHK


請Follow我們的YouTube頻道:https://bit.ly/2kgU8qg

 

下載我們的手機應用程式,收看第一手精彩內容:https://www.speakout.hk/app

15
支持
3
好正
0
無意見

評論