梁頌恆有何圖謀?
梁頌恆有何圖謀?

青年新政召集人梁頌恆呢個獨派人物,一邊搞港獨,一邊就喺反對修訂《逃犯條例》呢件事上發起包圍警總、煽動啲示威者去「衝」,但佢嘅「動作」原來不止於此,近日就被發現,佢同潛逃美國嘅國際刑警紅色通緝犯郭文貴進行「越洋視像通話」,對方叫梁頌恆「千萬要快行動」,仲話會喺金錢上支持佢、又話美國方面會保護梁嘅安全,梁頌恆則回應「美國那邊就靠你聯絡了」,雙方關係可謂耐人尋味。事後,梁頌恆自己亦都承認有過呢番「通話」,咁問題就嚟喇,梁頌恆除咗搞港獨、煽動圍警總之外,究竟係咪仲同一個潛逃海外嘅「紅通」犯罪嫌疑人有咩不可告人嘅秘密呢?究竟佢哋意欲何為?


囍雨睇到媒體一段網上流傳嘅影片報道話,梁頌恆進行視象對話時,背景喺金鐘夏愨道馬路,相信係早前示威者堵路時所拍。報道引述郭文貴喺在片中指,「港人反修例行動一定要快,否則就會徹底失敗」,又稱「會永遠支持」梁頌恆;梁就回應「明白明白,謝謝你郭先生,美國那邊就靠你聯絡了」,郭文貴隨即叫梁「放心」,仲話「保證兩件事」,一係金錢支持、一係「美國這邊交給我,全力以赴」,又指美國駐港總領事館會保障梁頌恆嘅安全。


問號一串串  疑陣滿佈


呢條影片係咪完全真確,囍雨唔肯定,但梁頌恆一向大搞激進港獨就路人皆知。近排梁頌恆又喺反修例示威裡面頻頻「蒲頭」,囍雨喺度諗,如果影片嘅對話內容屬實嘅話,咁大家真係要諗下,點解梁頌恆呢一啲獨派政客,要喺反修例嘅現場,同一個潛逃美國嘅通緝犯勾結呢?件事係咪咁單純?囍雨就相信,梁頌恆出現嘅目的,已經絕對唔係圍繞「反修例」咁簡單,而極有可能牽涉到搞港獨。尤其係對方講到「金錢支援」「保障安全」,要梁「千萬要快行動」,究竟係咩行動?咁「趕時間」究竟有何圖謀?而梁嘅一句「美國那邊就靠你聯絡了」又暗示緊乜野?一連串嘅問號背後,各路勢力疑陣滿佈,實在不得不防。


人格、誠信「無底綫」


無可否認,今次修例引發嘅風波,的確畀咗一啲別有用心嘅政客有可趁之機,好似梁頌恆咁嘅死硬分子,又點會唔「食住個勢」。但囍雨想提醒大家嘅係,睇番梁頌恆嘅「宣獨往績」,無論喺之前嘅「辱華宣誓」、「佔領西環」,抑或今次包圍警總,呢個曾經講到明「抗爭無底綫」嘅梁頌恆,搞親都係大鑊嘢,但幾乎次次都係叫人「衝」之後自己就「鬆」,囍雨越來越發覺,佢嘅套路就係先推班示威者做爛頭卒、搞場大亂,然後自己「靜雞雞」返去坐收漁利,睇佢可能會得到嘅係金錢支持兼人身保護,就更加令人覺得佢咁落力搞事係「有理由」嘅。對於呢個「形跡可疑」嘅政客,如果佢仲想煽動他人做任何行動時,其他人真係要小心為上!


原圖:視頻截圖

36
嬲爆
7
驚訝
13
唔係呀哇

評論