盲反派日前搞遊行反對《逃犯條例》修訂，遊行搞完兩日，盲反派就想發起罷工、罷課行動，想將學生都拉埋落水；而喺另一邊廂，英、美等外國勢力就繼續發功，對香港修例表示「關注」，前者重申維持「一國兩制」、《中英聯合聲明》嘅重要，後者則稱修例影響港府嘅高度自治。對於英、美官員呢種說法，廣男只可以講句，根本就同事實不符。

英、美接力發聲？

對於《逃犯條例》修訂一事，香港嘅盲反派政客同埋外國勢力，可以話係站喺「同一陣線」，自從本港盲反派到美、加、德等國「遊說」外國一齊反修例後，外國都非常積極發聲，今次盲反派搞完呢個「人數可觀」嘅遊行後，外國當然都要發聲啦；所以英國外交部亞太事務國務大臣田銘祺，就表示英政府會繼續向港府、中央政府重申，維持「一國兩制」同《中英聯合聲明》嘅重要，話任何移交安排都要符合香港高度自治精神，而美國國務院發言人奧塔格斯就認為，修例將會影響特區政府嘅高度自治，憂慮會損害營商環境，甚至令喺香港嘅美國公民「被引渡到中國」。

老實講，外國關注香港情況冇問題，但廣男覺得最重要嘅，係要擺事實、講道理，例如英國將修例同「一國兩制」、《中英聯合聲明》拉埋一齊嚟講，但修例既唔會影響市民嘅自由，移交過程又有法庭把關，符合法治精神，亦凸顯「一國兩制」下嘅高度自治，如果英國充分了解修例內容，廣男覺得英國政府唔需要有呢啲「關注」。美國話修例影響香港高度自治，引用上面講法，當然係無道理，因為啟動移交、決定係咪移交逃犯都係香港特區自行處理，邊度影響高度自治？至於美國公民會被「移交到內地」嘅講法，廣男就要問一句，如果無喺內地犯法後潛逃到香港，咁點會被移交？

恐懼蓋過事實

其實有唔少反對修例的市民都表達了一個觀點，就係唔可以俾呢條修訂通過，唔可以俾人有機會移交番內地。至於英美的政客，係咪一句「認為」關乎高度自治，就唔去堵塞漏洞呢？老實講，依家修例已經變成恐懼蓋過道理，「反內地」重要於一切，廣男想講句，對待今次修例，我哋唔應該剩係聽任何一方人士講乜，而係認真研究下修例目的、相關法律保障，睇下到底有啲乜嘢，係啲政客無講俾我哋知嘅！

原圖:RTHK