聶廣男,八十後,香港某大學畢業,主修資訊科技,I.T.新晉,靜待「上位」機會。對社會有不滿,未能置業,但比上不足,比下又有餘。傾向建設多於破壞,亦相信積極建言比將一切推倒來得實際。
作者其他博評
炒作修例 盲反派有如意算盤?
炒作修例 盲反派有如意算盤?

曾經聲稱自己會「日日做漢奸,有需要時就做漢奸」嘅盲反派元老、資深大律師李柱銘,結束美、加「唱衰」《逃犯條例》之旅後,撰文話林鄭月娥身為特首,居然主動「出賣香港」、「殺死一國兩制」,又接受訪問質疑林鄭月娥將修例責任推畀盲反派,邏輯大有問題,反問當初歐美唔出聲、佢哋唔外訪,港府係咪就會撤回修例。廣男就覺得,李柱銘一番說話嘅邏輯先至係大有問題,根本是詭辯,因為港府修例為應有之義,唔會因為盲反派唔外訪就唔立法,而盲反派「巡迴唱衰」香港,將修例問題提升到國際層面,則係激化矛盾嘅一大導火線!

 

對於李柱銘質疑林鄭月娥「卸責」一番說話,廣男必須要講句,邏輯有問題嘅係佢先啱,因為無論李柱銘去唔去美、加,或者前政務司司長陳方安生同立法會議員郭榮鏗去唔去德國,政府無論係為咗解決「台灣殺人案」問題,抑或堵塞法律漏洞,都有需要修例,唔存在「我哋(李柱銘等人)唔外訪港府係咪會撤例」嘅問題;而李柱銘等人訪美仲見埋美國國務卿,或者陳方生訪德見人哋個副議長,客觀效果只係令件事提升至國際層面,令本來無發表過意見嘅中聯辦甚至中央,都因為事件畀盲反派炒作到國際層面而發聲,令雙方關係更加僵!

 

不斷炒作修例「圖利」?

 

廣男就覺得,港府立法本來就無可避免,如果盲反派要傾要砌,喺立法會傾、約政府官員傾,可以就立法細節、條文修訂以至加強擬被移交者保障等問題「傾掂佢」;但佢哋而家「去到咁盡」,去外國搵外國政要甚至政府極高層官員去「投訴」,其實係咪想借機將事件有咁大炒作到咁大,繼而乘勢反政府、反中央,甚至為自己助選呢?民陣聲稱要發起第三次反修例遊行,仲有一個月多啲時間就係七一,之後再過兩個月啲政黨又會開始投入區議會選舉,盲反派不斷炒作、不斷拖延《逃犯條例》修訂,係咪想食住條水到選舉,真係得佢哋自己先知。

 

對於盲反派而言,如果唔借《逃犯條例》修訂炒作,咁樣無論係七一以至之後選舉,佢哋都好難再搵到「有力」議題作為「主軸」宣傳,當年反23條立法,就令到佢哋喺區議會選舉「進帳」唔少。但廣男喺度要提提大家,盲反派之前炒作高鐵「一地兩檢」問題,一樣講到世界末日咁款,「一國兩制」又無埋,甚至話行過西九高鐵站附近都有可能「畀人捉到」拉番去大陸,但事實證明,佢哋所講,Sorry,應該係話佢哋所「作出嚟」嘅嘢,根本從未發生過。當盲反派喺《逃犯條例》修訂問題上重施故技時,大家應該睇下佢哋以前點炒作,再諗清楚,佢哋今次有啲咩又「吹大咗」,切勿受謠言誤導。

 

原圖: 大公報

0
支持
1
好正
0
無意見

評論