暴力違法 歷歷在目
暴力違法 歷歷在目

「佔中九疑犯」案今日終於有裁決,一句講嗮:全部有罪!不過,就廣男所見,呢班違法佔領嘅始作俑者,無論喺法庭內外、人前人後,都依然美化緊自己嘅違法行為,繼續「扮偉大」,將自己包裝到係為香港爭取民主嘅 「政治犯」甚至係為港人「自我犧牲」嘅「義士」等等。相信廣大香港市民同廣男一樣,對於佢哋呢種顛倒黑白、慣於自我「貼金」嘅伎倆都見慣不怪,不過,睇住呢班人自欺欺人嘅表演,廣男腦海裡面就浮現出好多違法佔領期間嘅暴力畫面,不如就同大家一齊「回帶」,回顧下呢班「違法佔領」始作俑者當初口口聲聲所講嘅「愛與和平」、「非暴力」行動,到底係咩一回事!

 

肆意襲警 圍警搶犯


2014年10月14日。當晚九點鐘左右,一班示威者手持鐵馬、坑渠蓋衝出龍和道路面,佔據來回行車線,更以粗口辱罵警員,鬧警員「垃圾」、「去死啦」等等,又挑釁警員「搵人打我呀」、「唔好揸警棍、揸刀啦!」;兩日後嘅10月16日,當日凌晨,三名警員喺龍和道拘捕一名擾亂秩序嘅示威者,點知近200名示威者湧出嚟,包圍警員大聲叫囂「放人、放人!」,仲有人衝前想公然搶走疑犯,雙方對峙多時,場面極度危險混亂,最後警方需要增援解困,過程中三名警員因此而受傷。

 

當大家都以為經過幾次衝突,暴力事件會「逐漸退卻」,錯喇!之後去到12月1日,可以話係成個佔領期間最暴力嘅一日。當日朝早,三名休班警員喺金鐘海富中心畀十多名佔領人士圍毆,期間一名警員跌倒,示威者繼續用腳踩,導致該警員一度昏迷,情況嚴重;到當日夜晚,過千名示威者全副武裝包圍政府總部,不斷衝擊警方防線,擲雞蛋、水樽、頭盔,甚至用木板攻擊警員,更有示威者「升級裝備」,出動裝有鐵釘嘅「攻擊型盾牌」,導致十幾名警員受傷 ……

 

罪成都不忘扮偉大


類似嘅暴力事件當然唔止咁少,以上事件只係廣男「記憶所及」較為令人側目嘅「不和平」事件,睇到以上事件,大家會唔會仲覺得佢哋係「讓愛與和平佔領中環」?定擺明係「讓暴力充斥違法佔領」?老實講,犯法就犯法,暴力就暴力,犯法兼行動帶有暴力已經令好多人香港人義憤填膺,佢哋整色整水,將自己包裝到好似「政治犯」甚至「和平使者」咁,就更加令人睇唔過眼。追求民主無問題,但如果追求民主係要傷害他人仲要「理直氣壯」嘅,Sorry,廣男唔認同呢種將痛苦建築喺別人身上嘅「抗爭」手法!


原圖:大公網

4
嬲爆
2
驚訝
2
無意見

評論