【盡快立法】喂喂喂,「侮辱公職人員罪」唔可以冇咗件事喎!
【盡快立法】喂喂喂,「侮辱公職人員罪」唔可以冇咗件事喎!

話說早幾日,囍雨喺網上睇到篇文,內容係話講咗幾年嘅〈禁蒙面法〉只聞樓梯響,唔知幾時先至會浮返出水面。去到今日,有新聞報道話警察員佐級協會主席林志偉近日去信公務員事務局局長羅智光,再次要求訂立〈侮辱公職人員罪〉,信中強調守衛香港法律嘅公職人員,有需要受到法律保障免受侮辱。囍雨有時覺得,香港市民都真係幾善忘,明明〈禁蒙面法〉同〈侮辱公職人員罪〉嘅倡議,當日提出嚟時係獲得社會普遍支持嘅,何解過咗一段時間後,大家又會唔記得咗,唔通又等到有事發生時,大家先記得原來係未立法?

 

〈侮辱公職人員罪〉立法有必要

 

關於〈禁蒙面法〉,之前已經有人提起過,囍雨就唔多講喇,喺呢度集中講返〈侮辱公職人員罪〉。幾年前社會之所以有人提出要就此立法,大家都記得啦,係因為「違法佔領」同「旺角暴動」期間,香港警察依法執法時,受到大量無理侮辱同辱罵,當時唔少警員都慨嘆,執法者要「帶埋阿媽返工」,尊嚴同心理都受到極大傷害。

 

查實唔止警察架,咁多年來,香港公職人員執法時,都不時受到個別市民無理、無禮嘅對待,隨便舉幾個例子吖,好似交通督導員抄牌,經常會被部份無良車主或者駕駛者挑釁。又好似食物及環境衞生署人員咁,喺街上捉垃圾蟲、捉人隨地吐痰,甚至食依法驅趕無牌小販,經常都會受到涉嫌違法者嘅言語攻擊,聽到粗言穢語已經變成閒事,更過份係好似警察咁,連家人都畀人侮辱埋,咁先陰公嘛!

 

侮辱公職人員例子不少

 

其實例子仲有唔少架,好似衞生署控煙酒辦公室(前稱控煙辦)咁吖,捉人喺非吸煙區食煙喎,正常煙民就話乖乖受罰啫,但係大聲夾惡,嘗試恐嚇返公職人員轉頭嘅例子都真係唔少喎,相信大家都一定耳聞目睹過啦,唔係仲想否認呀?又例如地政總署又到新界地方拆僭建物咁,不少都有報道地政總署職員被人包圍,出言侮辱梗係有啦,郁手郁腳都唔係新鮮事喎!

 

講到尾,設立〈侮辱公職人員罪〉就真係刻不容緩架喇,警察員佐級協會其實都相當公道,因為佢哋並唔係只顧住自己,而係顧及整個香港嘅公職人員;〈侮辱公職人員罪〉如果成功立法,囍雨絕對相信會有提升前線公職人員士氣嘅作用。講真,班反對派政客成日諸多藉口去抗拒立法,但撫心自問,既然大家都認同香港人係文明嘅,有不滿咪循正常途徑去投訴同反映囉,唔使人身攻擊或者拎公職人員嚟出氣架喎,大家認唔認同先?


圖片來源:文匯報

1
嬲爆
10
支持
0
好慘呀

評論