天主教香港教區秘書長辦公處發出通告，公布湯漢樞機獲任命為天主教香港教區嘅「宗座署理」，負責喺教區主教出缺期間管理香港教區；對於湯漢被任命為「宗座署理」，反對派喉舌媒體，以以反對派政客之間可以話係揣測多多，包括指輔理主教夏志誠之所以唔可以接任主教，係因為佢喺七一遊行、六四事件甚至佔領都有表達過支持反對派嘅言行云云；身為天主教徒嘅公民黨主席梁家傑更話擔心「教廷因為中梵建交，認為升任輔理主教夏志誠是政治不正確」。一番危言聳聽，搞到連一向同反對派行得勁埋嘅榮休主教陳日君樞機都要開聲反駁，批評外界對呢次任命嘅解讀均為猜測，大巴大巴咁摑咗梁家傑一巴掌。梁家傑平時喺政治議題諸多揣測，而家連宗教事務都要「政治化」，講到自己乜都知咁，真係「厲害了，傑哥」！

夏志誠「怎能見容於中國」？

話說，梁家傑日前接受傳媒訪問，話湯漢樞機本身已經退休，質疑點解仲要做退休長者「翻閹出山」，認為安排「異乎尋常」；至於夏志誠未能「坐正」，梁家傑就指擔心教廷因為中梵建交大政策，認為升任夏志誠係「政治不正確」，「可能他曾參與六四燭光晚會，又參與七一遊行」、「怎能見容於中國？」咁話；講到似層層咁，但廣男只係想講一句，梁家傑所講嘅，全部都係佢嘅個人揣測，而出自佢把口，又點可能唔事事政治化、事事「反中化」呢？

廣男雖然平時唔係好Buy陳日君一啲政見或者言行，但廣男就覺得陳日君作為榮休主教，講教會事務點都畀梁家傑權威；陳日君就認為，外界對呢次任命嘅解讀「均為猜測」，又解釋教廷委任湯漢為「宗座署理」，可能係由於佢卸任主教一職一年多，對教會運作較熟悉，而且「宗座署理」嘅職權大於教區署理，方便繼續教務運作；相反，夏志誠輔理主教因為有機會成為主教人選，如果被推選為「署理主教」或會令佢置身尷尬局面。一個宗教嘅任命事宜，大家信政客「傑哥」，定係信榮休主教陳日君（記住佢兩個政治立場相近），真係自己諗下喇。

甚麼都可以政治化

對於梁家傑以至個別媒體、評論嘅種種揣測，廣男覺得用五個字就可以形容到，就係「無理政治化」事件！交通基建，反對派可以老屈話用盡公帑、債留子孫；「一地兩檢」，佢哋可以話係「方便內地人員嚟捉人」，到而家涉及主教嘅任命問題，梁家傑等人更可以「另類分析」，貫徹「乜都政治化」嘅盲反精神。請容許廣男喺度講多次，「厲害了，傑哥」！ 

圖片來源：大公報