雖然廉署、律政司已經決定唔會就UGL事件檢控全國政協副主席梁振英，但盲反派依然「窮追不捨」，好似佢哋先係最「權威」，先有權決定告唔告梁振英咁；噚日，休假完番香港嘅律政司司長鄭若驊見記者回應事件，講到明律政司工作不偏不倚、一視同仁，反問能夠做到呢個檢控決定，點解要另外尋求多一個法律意見。向來以「廉政」專家自居嘅民主黨立法會議員林卓廷，就話鄭若驊嘅法律專業屬調解訟裁，唔係刑事或者貪污案嘅專家，律政司應重新檢視案件，並尋求獨立法律意見云云。廣男真係好想講句，全世界都唔係專家，只有以林卓廷為首嘅政客、評論員以至傳媒先係「專家」，咁得未呀？

資深大律師不是法律專家？

對於林卓廷話鄭若驊唔係咩刑事案專家等等，廣男覺得「相當有趣」，廣男睇到呢番說話第一個反應就係，資深大律師唔係專家，唔通你林卓廷係專家咩？廣男唔知林卓廷有冇睇清楚鄭若驊履歷，鄭若驊除咗喺仲裁方面有番咁上下成就之外，其實鄭若驊喺2011至2017年擔任過香港高等法院原訟庭暫委／特委法官；一個做過高院法官嘅資深大律師，處理唔到刑事案件？林卓廷作為一個「外行人」去質疑內行人，實在惹笑。

再者，林卓廷指律政司司長唔係刑事專家所以要重新檢視案件嘅講法，邏輯都好有問題；就算廣男退一萬步「認同」鄭若驊唔係咩刑法專家，乜律政司入面得一個法律專業人士嘅咩？刑事檢控專員又唔熟刑事法呀？其他法律專業人士又處理唔到UGL事件呀？林卓廷玩政治攻訐，想隊死鄭若驊甚至梁振英都算喇，講嘢可唔可以有啲水平呀？

林卓廷先係「專家」？

當以林卓廷為首嘅盲反派人士係咁質疑律政司嘅時候，廣男想問一句，係咪律政司唔係專家，廉署唔係專家，審查貪污舉報諮詢委員會（入面亦有資深大律師喎）又唔係專家，而你林卓廷或者你班盲反派自己友先係「專家」呢？講咗咁耐，林卓廷完全無證據話人犯法，但就係咁迫律政司作出檢控，係咪玩政治凌駕法治先？

老實講，當林卓廷係咁話自己收到咩風、知道咩消息嘅時候，廉署明明係「保密」仲要係「密密實實」果隻，林卓廷一個前初級調查員會知道咁多嘢，佢平時匿埋喺廉署執行處處長枱底度「收風」架？好心唔好扮有內幕啦！引用前副廉政專員郭文緯先生兩句說話，「要知道林卓廷在廉署只工作三年，當年只是個助理調查員，職位所能接觸到的機密案件資料實在少之又少」、「如非處理該案的人員，根本無法得知該案的進展及案情，這樣的Need-to-know原則，在廉署執法上恆之有效。」所以當年喺廉署做「初級的調查員」嘅林卓廷話知道廉署內部什麼消息、得到甚麼UGL事件什麼調查資料等，都係得個吹字，講咗四年都攞唔出證據，你唔係信佢呀嘛？！

原圖：RTHK