廣男記得以前讀書，有老師除咗上堂教授大家知識之外，喺面對學生「出貓」、有違紀行為嘅時候，同啲同學講做人最緊要有「人格」，否則搵到幾多錢、做到幾高職位都冇用；到咗廣男投身社會工作、開始多關心社會事務嘅時候，就發現冇人格嘅人比比皆是，有啲人甚至乎係借住不斷作出「冇品」行為而上位，做埋議員。講緊邊個，咪就係畀前黨友話佢「人格卑劣，毫無政治道德」嘅民主黨立法會議員林卓廷囉！講真，幾十人退黨，然後差唔多所有人都將矛頭指向林卓廷，都咪話唔壯觀！

人格卑劣的林卓廷

之前有消息指民主黨新界東支部好多人想退黨，仲話係因為同林卓廷不和而退黨，初時廣男都半信半疑，一大班人因為一個人而退黨，會唔會呀？點知單嘢原來「堅過石堅」，59個民主黨人退黨，當中58人屬於新界東支部（即係林卓廷根據地），仲要有唔少將矛頭直接指向林卓廷，話佢「人格卑劣，毫無政治道德」，指控佢嘅罪狀嚴重得嚟又非常明確，包括：製造人為撞區、迫害黨友、地區工作唔得等等，林卓廷一下子可以「趕走」民主黨咁多人，都咪話唔犀利。

對內畀人鬧佢人格卑劣，林卓廷對住外人當然一樣都冇咩人格可言啦；好似UGL事件咁，一份明明無CASE可言嘅離職協議，畀佢「吹到」好似有人「貪污」咁，甚至不惜作出疑似誹謗言論，兼為咗博出位而披露受查人身份，極可能違反防賄條例當中唔可以披露受查人身份嘅部份。

清白者照屈！

更離譜嘅係，當廉署、律政司都就「UGL事件」還全國政協副主席梁振英清白嘅時候，林卓廷為咗繼續炒作事件連審查貪污舉報諮詢委員會都踩埋一份，話人哋一般都唔會點質疑律政司，但實情就係呢個「審貪會」獨立得嚟權力亦都好大，甚至可以連廉署、律政司報告都照Ban。林卓廷曾經作為廉署調查員，無論佢幾初級都好，畢竟都曾經係廉署人，為咗政治攻訐政敵連廉署或者「審貪會」都可以踩幾腳，呢條友真係乜都做得出。

廣男就喺度諗，林卓廷一方面涉嫌違反《防賄條例》第30條，喺廉署調查期間不斷公開宣揚一方面自己又因為喺立法會搗亂而被拘捕、起訴，而自己喺新界東又同自己友「內鬥」；如果警方告得入佢、廉署又拉佢，而佢喺新界東又「老巢不保」的話，咁佢嘅卑劣人格，真係會為佢帶嚟「最大報應」！講到呢度，係喎，差啲唔得講，林卓廷當日有份同疑似報假案嘅「釘書健」林子健出嚟開記者會，指控被「內地執法人員」綁架喎，大家係唔係已經唔記得咗呢件事呢？林卓廷自從林子健出事之後，一直都唔敢再提呢件事囉，大家唔係就咁放過林卓廷嘅政治責任呀？

圖片來源：RTHK