朱凱迪成功誤導傳媒 一開始已經係劇本
朱凱迪成功誤導傳媒 一開始已經係劇本

「自決派」朱凱迪參選村代表被DQ,反對派隨即群起而攻,一時話《基本法》104條內容唔包括村代表,所以選舉主任冇權力DQ參選人;一時又學晒朱凱迪講法,話參選人自己唔支持「港獨」都唔夠,一定要反對其他人「港獨」先可以入閘。事實上過去幾日,囍雨都已經寫過幾次相關內容,今日唔會再講太多;反而係,各位心水清嘅讀者其實有冇諗過,成件事由頭到尾都係朱凱迪設嘅「局」,佢一早已經諗好點去主導輿論,等部份不問是非嘅傳媒跟住佢支魔笛走呢?


DQ朱凱迪依據為香港法例


喺度再講一次,選舉主任今次DQ朱凱迪,並唔係根據《基本法》104條或者人大常委就住呢條嘅釋法內容,選舉主任今次嘅權力來源,係香港本地法例《鄉郊代表選舉條例》,以及《選舉程序(鄉郊代表選舉)規例》。因此,反對派同朱凱迪本人不斷話唔關《基本法》事,明顯係對錯焦,至於係因為「無知」,定係「刻意為之」,咁就真係等佢哋自己先知喇。


至於另一點,即係朱凱迪自己口中嘅「參選人自己唔支持『港獨』都唔夠,一定要反對其他人『港獨』先可以入閘」,呢個就絕對係無的放矢。其實,無論係喺選舉主任第一次回覆朱凱迪嘅信函,又或者係最後清晰交代DQ朱凱迪原因嘅時候,選舉主任一直都重申只係關心朱凱迪本人對「自決」嘅立場,從來都冇要求朱凱迪就其他人嘅行為或主張表達意見!


所有誤報來自朱凱迪回覆


好喇,咁到底上述兩個「誤會」係點嚟嘅呢?只要睇返資料,明眼人即時可以知道,一切都係按住朱凱迪嘅劇本去走。睇返時序,選舉主任上月26日第一次去信朱凱迪,向佢查詢關於「港獨」同「自決」嘅立場;朱凱迪27日回信,清楚講明自己唔支持「港獨」,但就冇直接答關於「自決」嘅問題,反而單方面揣測選舉主任查詢嘅理由,原文係咁:「選舉主任問香港獨立是否自決前途的『選項』,背後的想法是我不單自己不可主張港獨,也要反對甚至禁止其他人有此主張,否則就是不擁護《基本法》。」


由呢次回信開始,香港部份傳媒就被朱凱迪牽住鼻子走,將朱凱迪一己揣測視為事實咁去報道,認真失禮。至於質疑選舉主任「冇權」、村代表選舉唔關《基本法》104條事等等,相關內容其實亦係來自朱凱迪回畀選舉主任嘅信函,朱凱迪上月28日第二次回覆選舉主任追問時,堅拒回應自己對「自決」嘅立場,反而引用大量法律意見,指出村代表選舉唔喺《基本法》104條同埋人大釋法範圍,認為選舉主任冇權向佢查詢。大家睇到呢,由始至終選舉主任都冇話自己係根據《基本法》104條去查詢朱凱迪,由頭到尾都係佢「自說自話」!


信息來源睇清楚 唔好畀朱凱迪誤導


成個「局」非常清楚,朱凱迪連日來都夾硬將自己嘅見解、揣測同睇法,猛咁塞落選舉主任把口度,將自己嘅「一己說法」演繹成選舉主任嘅「意見」,偏偏香港唔少傳媒有理冇理,跟咗朱凱迪嗰套就算,又唔睇清楚選舉主任有冇真係講過嗰啲嘢,全部跌晒落朱凱迪預設嘅劇本度,做晒老屈選舉主任嘅幫凶。朱凱迪未來會點做,囍雨預計唔到,只係希望香港傳媒將來報道呢件事時加倍留心,到底邊啲係朱凱迪講、邊啲係選舉主任/政府講,溝亂晒嚟報道,市民好易誤會架!


圖片來源:香港電台即時新聞

15
支持
11
好正
7
點算呀
15
搞笑咩

評論