反對派選舉期間又玩滋擾
反對派選舉期間又玩滋擾

隨住立法會九龍西補選開始倒數,啲選舉「火花」叫做開始越嚟越多。日前喺九龍西嘅宣傳「熱門地點」美孚,候選人之間又起衝突,早有前科嘅李卓人團隊又玩滋擾,助選團成員、前立法會議員劉小麗係咁追住陳凱欣嘅義工嚟鬧,一時話人係「爪牙」、一時又話人「出賣港人利益」。廣男覺得好奇怪,之前李卓人畀曾麗文狙擊,即時譴責選舉暴力,其後仲因為自己團隊嘅人滋擾陳凱欣而當眾致歉咩?點解發生咗咁多事之後,李卓人團隊仍然堅持去滋擾其他候選人?唔通李卓人團隊認為,佢哋就唔可以被滋擾,但隨便滋擾對手都冇所謂?


劉小麗有必要清楚交代


關於劉小麗作出滋擾行為一事,佢本人就喺Facebook話,當日成哋班「跑步助選團」諗住喺美孚跑步到深水埗,點知朝早集合果時畀自稱法團成員嘅女子聯同屋苑保安以屋苑範圍禁止做政治宣傳由為,要求劉小麗佢哋離開。其後,劉小麗發現該名自稱法團成員嘅女子去咗陳凱欣嘅街站助選;而陳凱欣果邊呢,就話面對無禮、惡意及肆意挑釁嘅對待,都唔能夠打擊成個團隊嘅決心,反而更加堅定佢哋嘅信念,「我只想努力建設,不想再見到肆意破壞」。


由於劉小麗一方嘅解釋唔清唔楚,單憑字面去推斷,劉小麗係喺人哋「私人屋苑」集合準備做「政治宣傳」,但就畀自稱屋苑法團成員嘅人同保安驅趕。之後,劉小麗就去到人哋街站果度(公眾地方),見到有份趕佢離開「私人屋苑」嘅人,於是就衝埋去玩滋擾。喺呢度,廣男想問,想喺「私人屋苑」範圍準備做政治宣傳,如果人哋係一視同仁,唔畀任何人喺私人地方做政治宣傳又有咩問題?但係陳凱欣做宣傳嘅地方係公眾地方(港鐵出口),不被驅趕又點算係厚待呢?如果認為有,咁有冇證據可拎出嚟畀公眾?


不滿就滋擾 無法無天


不過,更重要嘅問題其實係,就算劉小麗有幾不滿被人驅趕都好,係咪就代表佢可以任意去滋擾人呢?好,就當當日有份驅趕佢嗰位自稱屋苑法團成員嘅人,隨後真係去咗做陳凱欣助選團,請問一句咁又點?大原則其實好清楚,係有冇「一視同仁」吖嘛!先前佢支持嘅候選人李卓人先至高調譴責選舉暴力,仲曾經為自己助選團滋擾陳凱欣而致歉;言猶在耳,劉小麗同埋穿著住李卓人助選團衣飾嘅人帶埋道具又走去滋擾人,到底係劉小麗違背咗李卓人反對選舉暴力嘅原則,定係李卓人都默許自己嘅助選團包括劉小麗走去滋擾人先?李卓人作立法會九龍西補選候選人,回應幾句好喎!


現時立法會九龍西補選共有五名候選人,包括伍迪希、曾麗文、李卓人、馮檢基同陳凱欣。


原圖:Takungpao

6
嬲爆
2
驚訝
2
唔係呀哇
2
無意見

評論