立法會九龍西補選今個25日舉行，紮根九龍西多年嘅馮檢基參選喺反對派陣營受盡「千夫所指，佢日前接受報章專訪嘅時候，話自己今次選舉受到反對派「全宇宙式打壓」，包括話佢同性戀、「收人錢」，又指自己堅持參選係要糾正反對派嘅錯誤，批評反對派推翻民主初選制度，只會「步向滅亡」。馮檢基一番說話，除咗體現到反對派嘅無情之外，廣男所感受到啲，就係所謂「民主派」（盲反派），根本就一啲都唔民主。

誰掉轉槍頭？

馮檢基接受訪問嘅呢番說話，令廣男記起前幾日有電台搞咗個選舉論壇，另一候選人、工黨李卓人直指馮檢基「掉轉槍頭」，廣男就喺度諗，一場民主選舉，只要符合參選資格，無論佢係馮檢基好、李卓人好甚至曾麗文都好，理論上都可以參選；李卓人而家話馮檢基「掉轉槍頭」，係咪想講佢自己先可以代表到成個「民主派」或者反對派，其他人參選就係唔啱呢？

老實講，喺盲反派今次無初選機制嘅情況下，單純話馮檢基「𠝹票」或者「掉轉槍頭」，講落去始終都有啲唔公道；除咗任何合資格人士都可以參選之外（自決、港獨派是例外），馮、李都係反對派人士，都係前立法會議員，但講到九龍西，其實馮檢基先至係真正紮根喺九龍西多年嘅反對派政客，李卓人係空降落西九果個，如果真係要話有候選人「掉轉槍頭」，其實大家都可以話李卓人「掉轉槍頭」架喎！

玩政治操作能吸票？

另外，通常喺選舉入面，反對派人士都係對準建制派嚟攻擊，希望打擊到佢哋令自己政治上得分以至攞到更多選票，但廣男非常懷疑李卓人呢種策略係錯誤嘅。再以日前嘅選舉論壇為例，李卓人話醫療開支少咗幾億借機攻擊前食衛局政治助理陳凱欣，但就畀陳凱欣「將番一軍」，話2016年有關開支其實係加咗先啱，質疑李卓人用一個「推算數字」去抹黑人。老實講，李卓人作為前立法會議員竟然咁唔熟書，實在可笑可笑。

綜合近幾個星期嘅觀察，廣男覺得反對派「代表」李卓人開選舉策略係「迫馮檢基入窮巷」，同埋攻擊陳凱欣。社會「嘈咗咁耐」，市民都希望自己選到踏踏實實嘅從政者入立法會做嘢，唔知選民仲會唔會BUY呢種炒作STYLE呢，廣男相信，大部分選民都希望候選人係比理想、比政綱、比能力囉！

現時立法會九龍西補選共有五名候選人，包括伍迪希、曾麗文、李卓人、馮檢基同陳凱欣。 

原圖：Takungpao