聶廣男,八十後,香港某大學畢業,主修資訊科技,I.T.新晉,靜待「上位」機會。對社會有不滿,未能置業,但比上不足,比下又有餘。傾向建設多於破壞,亦相信積極建言比將一切推倒來得實際。
作者其他博評
馮檢基決戰李卓人?
馮檢基決戰李卓人?

立法會九龍西補選提名期上星期結束,繼食衛局前政治助理陳凱欣同前立法會議員馮檢基之後,工黨李卓人都正式成為補選嘅候選人。廣男覺得呢場選戰感覺怪怪的,因為以往有換屆選舉或者補選,都一定係盲反派同建制派嘅對決,但今次補選好似係盲反派對決盲反派咁,呢邊廂主流盲反派係咁狂攻馮檢基,馮檢基喺另一邊廂又接受訪問批評李卓人係「欽點之子」,搞到成地「花生」。廣男真係好期待喺之後嘅公開選舉論壇,馮檢基點樣決戰Plan B(即李卓人)。

馮檢基反欽點

今日廣男睇新聞,見到馮檢基接受某媒體專訪,直言佢自己知道劉小麗今次欽點李卓人做Plan B之後「㷫過火屎」,批評盲反派推翻三月建立嘅民主初選機制,反而用協商欽點,令「細聲要服從大聲」,佢想透過選舉講出「反欽點」,仲話盲反派啲人鬧得佢越勁,就越迫到佢無得讓步。廣男覺得馮檢基仲講咗一番好有道理嘅說話,就係議席本來係工具,係用嚟爭取民主、改善民生,但盲反派而家以議席為目標玩欽點,就算目的正確,手段不正確都係錯。

盲反派一直有一種講法,類似係劉小麗以至李卓人先至係陣營所推薦嘅候選人,馮檢基參選係「𠝹票」咁話;咁廣男就有一個疑問喇,民主唔係應該邊個想參選就參選嘅咩?盲反派咁做係唔係終身剝奪馮檢基嘅參選權呢?講開「𠝹票」,馮檢基比李卓人參選在先,而且九龍西又係馮檢基嘅「根據地」,李卓人喺2016年敗選前係新界西嘅立法會議員,真係要講「𠝹票」,係咪調番轉講李卓人「𠝹」馮檢基票都合理呢?

攻馮檢基 策略錯誤?

唔係廣男想教精盲反派或者李卓人,但佢哋而家集中精力狂攻馮檢基,真係好蠢。第一,佢哋狂攻馮檢基,馮檢基又還擊,咁有個可能結果就係盲反派支持者兩邊都唔想幫,兩個都唔投票,甚至將啲同情票畀馮檢基;第二,其實李卓人而家Sell緊反對東大嶼填海,廣男假設唔少盲反派支持者都反填海,但佢哋而家成日同馮檢基「互片」,仲有邊個理佢哋炒緊咩議題呢;第三,選舉勝負好多時都係睇中間選民取向,而家啲較中立嘅市民見到李卓人一夥人成日玩人格謀殺,會點諗呢?廣男又係果句,「凡事太盡,緣分勢必早盡」囉!

截至目前,已成為九龍西立法會補選候選人嘅包括陳凱欣、馮檢基、李卓人、伍廸希同曾麗文。

原圖:馮檢基Facebook專頁

10
搞笑咩
1
嬲爆
3
好好笑

評論